Ձեր պաշտոնավարման ընթացքում հետհայացքով որ նայում եք, բացթողում ունե՞ք, կա՞ այնպիսի բան, որ արել եք սխալ, կամ համարում եք, որ պետք է անեիք, բայց չեք արել: Այսօր 44-օրյա պատերազմի հանգամանքներն ուսումնասիրող քննիչ հանձնաժողովում ՊՆ նախկին նախարար Դավիթ Տոնոյանին այս հարցն ուղղեց ՔՊ պատգամավոր Վիլեն Գաբրիելյանը:
Տոնոյանը պատասխանեց, որ այս ընթացքում արդեն խոսել է այն մասին, թե ինչը չի կարողացել հաղթահարել. «Զինված ուժերի խնդիրն է՝ կռվել եւ հաղթել, ՊՆ խնդիրն էր՝ ապահովել, որ կռվեն եւ հաղթեն, ընդ որում, ապահովումը ոչ միայն սպառազինության եւ ռազմական տեխնիկայի առումով է, ե՛ւ ֆինանսական միջոցների, ե՛ւ տեղեկատվական ապահովման, ե՛ւ պաշտպանական քաղաքականության, որը պետք է ձեւավորվեր եւ իրականացվեր ճշգրիտ: Ես անձամբ գտնում եմ, որ իմ ամենամեծ պատասխանատվությունն այն է, որ ես չկարողացա կանգնեցնել այս պատերազմը: Ե՛վ ընթացքում, ե՛ւ մինչ պատերազմի սկիզբը: Իմ ռազմադիվանագիտական հմտությունները, իմ գիտելիքները, կապերը բավարար չեղան, որ ես կանգնեցնեմ, պատերազմի սկիզբը չլինի»:
Հռիփսիմե ՋԵԲԵՋՅԱՆ
