Այսօր 44-օրյա պատերազմի հանգամանքներն ուսումնասիրող քննիչ հանձնաժողովում ՊՆ նախկին նախարար Դավիթ Տոնոյանը հայտարարեց, որ չի ընդունում այն մոտեցումը, թե բանակի համար ինչ ուզել են՝ տվել են:
ՔՊ պատգամավոր Հայկ Սարգսյանը հարցրեց՝ անձնական պաշտպանության միջոցները՝ զրահաբաճկոնն ու պաշտպանիչ սաղավարտը ինքնաթիռ կամ տանկ չի, որ դժվար լինի տեղափոխել կամ արտադրել ՀՀ-ում, ինչո՞ւ է մեր բանակը պատերազմի ժամանակ ունեցել անձնական պաշտպանական միջոցների խնդիր՝ քանակական եւ որակական առումով:
Տոնոյանն ի պատասխան հակադարձեց՝ համեմատության մե՞ջ եք դնում Սու-30-ն ու կասկաներն ու զրահաբաճկոնները. «Երեւի թե դուք անձամբ սահմանափակումների հետ կապված որոշակի դժվարություններ եւ տեղեկատվություններ ունեք, բայց եւ սաղավարտը, եւ զրահաբաճկոնը, եւ Սու-30-ը ռազմական նշանակության արտադրանք են, եւ դրանց ներկրումը Հայաստան սահմանափակվում է եւ թույլատրվում է նույն ձեւաչափով: Փակ նիստի ժամանակ կասեմ սաղավարտների եւ զրահաբաճկոնների ներդիրների հետ կապված խնդիրների մասին, հուսով եմ, ՀՀ-ում արդեն ներդիրների սերիական արտադրություն կա արդեն, բայց այն ժամանակաշրջանում ներկրվող էր եւ դա ռազմական նշանակության արտադրանք էր: Դա որսորդական կամ ոստիկանական, թիկնազորի զրահաբաճկոն չէ: Ռազմականը նույն դժվարությունների է հանդիպել, կարող եք ստուգել` ինչի հետ ենք մենք առնչվել»:
Հայկ Սարգսյանը արձագանքեց՝ «եթե խնդիրը ձեւակերպված լիներ, արտադրողները կգտնվեին ու կարտադրեին Հայաստանում կամ դրանք որպես որսորդական կգային ու կծառայեին պատերազմի ընթացքում, այսքանով կսահմանափակվեմ»: Տոնոյանը պատասխանեց. «Ո՞վ է ասում, որ այդպիսի խնդիր դրված չի եղել, որտեղի՞ց է ձեզ այդպիսի տեղեկատվությունը: Որսորդական զրահաբաճկոնի օգտագործումը զինված ուժերում արգելված է»: Հայկ Սարգսյանը հեգնեց. «Այսինքն, ավելի նպատակահարմար է մարդուն սպարտիվկով տանել պատերազմի, քան որսորդական զրահաբաճկոնո՞վ»: Տոնոյանը պատասխանեց. «ՀՀ ԶՈՒ-ն իր ամբողջ կազմով իմ պաշտոնավարման ժամանակ երբեւիցե զրահաբաճկոնի, սաղավարտի խնդիր չեն ունեցել: Խնդիրն առաջացել է զորահավաքային ռեսուրսների հետ կապված»:
Կարդացեք նաև
Հռիփսիմե ՋԵԲԵՋՅԱՆ
