44-օրյա պատերազմի քննիչ հանձնաժողովում ՊՆ նախկին նախարար Դավիթ Տոնոյանին հանձնաժողովի անդամ Վահագն Ալեքսանյանը հարցրեց պատերազմի ժամանակ դասալքության դեպքերի ծավալից: Տոնոյանը հրաժարվեց այդ մասին խոսել՝ ասելով միայն, որ 44-օրյայի ժամանակ կարող էին լինել եւ եղել են նման դեպքեր:
Ալեքսանյանի հարցին՝ ունեցե՞լ են դրանք կազմակերպված բնույթ, քանի որ զորահավաքային մոբռեսուրսի հետ է եղել խնդիրը հիմնականում, նրանց մեջ են սերմանել դա՝ Տոնոյանը պատասխանեց. «Ես հնարավորություն ունեցել եմ հրապարակային իմ դժգոհությունը հայտնել այսպես ասած 5-րդ շարասյան հետ կապված եւ ես սրտատրոփ սպասում եմ փաստերի ներկայացմանը: Եթե այդպիսի բան է եղել 5-րդ շարասյան հետ կապված, ես կուզենայի դրա վերաբերյալ իմանայի: Քանի որ դա հրապարակային է ասվել, կուզենայի, որ փաստերը նաեւ հրապարակային ներկայացվեին: Ինչ վերաբերում է ուղղորդված դասալքությանը, կարող եմ ասել, որ դասալքության հիմնական պատճառը կազմակերպչական եւ վախի եւ զորահավաքային կոնցեպտի արդյունք է եղել: Վախը բնական բան է, բայց վախը հաղթահարելու համար անհրաժեշտ է պատրաստություն, որպեսզի լինի պատրաստություն, պետք է կազմակերպչական աշխատանք: Մենք շատ սուղ ժամանակահատվածում ենք աշխատել, որ կարելի լինի ուղղորդել, բայց որ դրանք ուղղորդվում են՝ ես այդպիսի տեղեկություններ չունեմ»:
Հռիփսիմե ՋԵԲԵՋՅԱՆ
