Fitch-ը Հայաստանի վարկանիշը բարձրացրել է, սա դրական է, որովհետեւ նաեւ նշել է, որ մեր տնտեսական աճը, եւ ընդհանրապես, կայուն մակրոտնտեսական միջավայրը հիմք է եղել, որպեսզի մեր վարկանիշը բարձրացնեն։ Այս մասին այսօր հրավիրված ասուլիսում ասաց ԿԲ նախագահի տեղակալ Արմեն Նուրբեկյանը։
Fitch-ը կանխատեսել է, որ 2023-2024-ին դրամը չափավոր կարժեզրկվի, նույնիսկ ավելի բարձր մակարդակով, քան եղել է ռուս-ուկրաինական պատերազմի սկզբին։ Լրագրողի այս դիտարկմանն ի պատասխան` Նուրբենկյանն ասաց՝ այսօր նման նախադրյալներ ԿԲ խորհուրդը չի տեսնում․ «Արժութային շուկայում այսօր արժեւորման ճնշումները շարունակվում են, եւ այս իմաստով որեւէ նոր բան արժեզրկման իմաստով չենք տեսնում։ Մեր երկիր մարդկանց եւ կապիտալի հոսքերը հիմնականում կայունացել են, բայց դեռեւս գտնվում են բարձր մակարդակում»։
Նրա խոսքով՝ դրամի որոշակի արժեզրկում հնարավոր է, հնարավոր է նաեւ արժեւորում․ «Այդ սցենարները երկկողմանի են, դրա համար ԿԲ-ն խոսում է փոխարժեքի մասին որպես հետեւանք, այլ ոչ թե որպես պատճառ։ Փոխարժեքի արժեզրկումը կամ արժեւորումը շատ բաներից են կախված։ Օրինակ՝ եթե այս հոսքերը շարունակվեն ավելի արագացված տեմպերով, բնականաբար, Fitch-ի սցենարը իրատեսական չի լինի, քանի որ մեզ մոտ արժեւորման ճնշումներ կլինեն։ Եթե հակառակ երեւույթները լինեն, ապա հնարավոր է արժեզրկում լինի։ Ամեն դեպքում՝ Fitch -ը փոխարժեքի այս սցենարի մեջ դրել է չափավոր արժեզրկում։ Ես ուզում եմ դա կապել մեր արտադրողականության աճի եւ պոտենցիալի հետ, քանի որ, ըստ էության, հարցն այն է, որ այս բարձր տնտեսական աճի պայմաններում, որի հետեւանքն է անցած տարվանից մինչ օր փոխարժեքի արժեւորումը, որքանո՞վ է դա իրականում լինելու երկարատեւ՝ կախված ՀՀ արտադրողականության երկարաժամկետ աճի հետ։ Այսինքն, եթե այդ բարձր աճը ավելի երկարաժամկետ է, նշանակում է բարձր արժեւորված դրամի փոխարժեքը երկար կլինի, կամ հակառակը։ Ըստ էության, Fitch-ն արձանագրել է, որ մեր բարձր տնտեսական աճի էական մասը կարճաժամկետ չէ, դրա համար մեր փոխարժեքն իրենց սցենարում չի գնում նախկին մակարդակներին, այլ նշում են, որ որոշակի արժեզրկման ուղղությամբ է գնում»։
Մանրամասն՝ տեսանյութում
Կարդացեք նաև
Նշենք, որ ԿԲ խորհուրդն այսօր որոշել է իջեցնել վերաֆինանսավորման տոկոսադրույքը 0.25 տոկոսային կետով՝ սահմանելով 10.25 %։
Նելլի ԲԱԲԱՅԱՆ
