44-օրյա պատերազմի քննիչ հանձնաժողովում ՊՆ նախկին նախարար Դավիթ Տոնոյանից հանձնաժողովի անդամ Վահագն Ալեքսանյանը ճշտեց՝ ընդդիմությունը, մասնավորապես՝ ՀՀԿ-ից ասում են, որ 2018-ին ՍՌՏ-ի (սպառազինություն և ռազմական տեխնիկայի․–խմբ․) ձեռքբերման պլանով նախատեսված է եղել ՀՕՊ համակարգեր գնել, բայց Փաշինյանի իշխանությունը եկել ու հանել է դա, եղե՞լ է նման բան: Տոնոյանը պատասխանեց. «Ավելացրել ենք, սպառազինության եւ ռազմական տեխնիկայի ծրագրում Օսա ԱԿ-Մ-ները, որոնք հնարավորություն ստեղծվեց ձեռք բերելու, մենք տողերում տեղերով համալրեցինք, լրացրեցինք: Բացի դրանից, գինը մի քանի անգամ իջեցվել է: ՏՕՌ-երի քանակը՝ այդ ժամանակի համար պլանավորված, ձեռք են բերվել քանակական առումով ավելի շատ, քան նախատեսված է եղել»:
Դավիթ Սանասարյանը հարցրեց՝ պատերազմից հետո դուք անձամբ վերլուծե՞լ եք այն, ինչ ձեռք բերվել, դա՞ էր մեր կարիքները ու կա՞ր բան, որ պատերազմի ժամանակ հասկացաք, որ իրականում դրա պահանջարկը մեծ էր, բայց արդեն ուշ է դա ձեռք բերելը: Տոնոյանը պատասխանեց, որ փակ նիստում ինքը փորձագիտական մակարդակով կասի. «Ես ունեմ լուրջ հիմնավորումներ, թե ինչ է պետք հավելյալ անել՝ հաշվի առնելով գլխիս եկածը»:
Հռիփսիմե ՋԵԲԵՋՅԱՆ
