ՄԱԿ-ի երեւանյան գրասենյակի մոտ «Կանայք հանուն Արցախի» խորագրով հացադուլին այսօր միացել է արցախցի, մասնագիտությամբ մանկավարժ Մարինա Ազարյանը։ Նա նշեց, որ կոչ է անում միջազգային հանրությանն ու ՄԱԿ-ին, որ աջակցեն Բերձորի միջանցքի բացմանը։ «Արցախցիները երբեք չեն ասի՝ ես սոված եմ, հպարտությունը թույլ չի տալիս, բայց ես գիտեմ, որ սոված են, ընտանիքիս անդամները Արցախում են»,- «Առավոտի» հետ զրույցում ասաց նա։
Մարինա Ազարյանը նախորդ տարվա դեկտեմբերին 5-ին է եկել Հայաստան՝ Արցախ վերադառնալու նպատակով, բայց արդեն դեկտեմբերի 12-ին ճանապարհը փակվել է։ «Մտքումս մտածում էի՝ երեւի ապրիլի մեկին կբացվի ճանապարհը, հետո մայիսի 1-ին կբացվի, Արցախից էլ էին ասում, որ կբացվի, բայց հունիսի մեկն էլ անցավ, հուլիսի մեկն էլ անցավ, ճանապարհը չբացվեց»,- նշեց նա։ Նրա՝ խոսքով՝ արցախցների համար այսօր ավելի կարեւոր է իրենց ինքնորոշման իրավունքի ճանաչումը, քան հումանիտար բեռը։ «Ես կրկնում եմ՝ իրենք քաղաքական հարց են դնում, անգամ չեն էլ շահարկում, որ սոված են, սնունդ չկա։ Մեզ պետք է միջանցքը բացվի եւ ինքնորոշման իրավունքը ճանաչվի։ Ես կարծում եմ՝ Հայաստանի քաղաքացիները պետք է միասնություն դրսեւորեն, բայց միասնություն չկա։ Մարդիկ չեն մասնակցում ցույցներին, քչերն են արձագանքում»,- ասաց նա։
Կարդացեք նաև
Մարինա Ազարյանը նաեւ հավելեց, որ արցախցիները չեն պատկերացնում, թե ինչպես կարող են ապրել Ադրբեջանի կազմում։ «Ոչ մի դեպքում նրանք այդ սցենարների մասին չեն մտածում։ Եթե այս պատերազմը չլիներ, գուցե այդ հարցը քննարկվեր, բայց այս պատերազմից հետո դա անհնար է, բացառվում է։ Եթե Արցախը ճանաչվի Ադրբեջանի կազմում, ամենաշատը մեկ շաբաթ անց հայկական Արցախ այլեւս չի լինի»,- ասաց Մարինա Ազարյանը։
Ռոզա ՀՈՎՀԱՆՆԻՍՅԱՆ
