Ադրբեջանի արտգործնախարարությունը Հայաստանի արտգործնախարար Արարատ Միրզոյանին մեղադրել է բանակցային գործընթացի և ձեռք բերված պայմանավորվածությունների կոպիտ խախտման մեջ:
«Հայաստանի արտգործնախարար Արարատ Միրզոյանը հուլիսի 27-ին լրատվամիջոցներին տված հարցազրույցում Ադրբեջանի նկատմամբ տարածքային հավակնություններ առաջ քաշելուց բացի հանդես է եկել չհիմնավորված շահարկումներով, որոնք կոպտորեն աղավաղում են բանակցային գործընթացը և ձեռք բերված պայմանավորվածությունները, ինչպես նաև պատմական փաստերը»,- ասվում է Ադրբեջանի ԱԳՆ տարածած հաղորդագրության մեջ:
Դրանում նշվում է, որ «հակաադրբեջանական արշավը հայկական կողմից, որը չի կատարել տված խոստումները և ստանձնած պարտավորությունները, ինչպես նաև նրա հռետորաբանությունը, որն ի չիք է դարձնում խաղաղության պայմանագրի բանակցությունները և միջազգային միջնորդների ջանքերը, ևս մեկ անգամ ապացուցում են, որ Հայաստանը շահագրգռված չէ տարածաշրջանի խաղաղության և անվտանգության հարցում»:
«Հատուկ նշանակություն ունի միջազգային հանրության գնահատականը Հայաստանի ԱԳՆ ղեկավարի ագրեսիվ հռետորաբանությանը, որը փոխանակ աջակցելու ծագումով հայ բնակչության վերաինտեգրման Ադրբեջանի ջանքերին, ներկայացրել է իր սադրիչ և որևէ տրամաբանության մեջ չտեղավորվող «ցանկություների ցանկը»,- ասվում է հայտարարության մեջ:
Կարդացեք նաև
Բաքվում կարծում են, որ «Միրզոյանի կողմից Հայաստանից ադրրբեջանցիների բռնի արտաքսման փաստի հերքման, Արևմտյան Ադրբեջանի համայնքի իրավունքների և Ղարաբաղի շրջանի հայ բնակիչների իրավունքների նկատմամբ զուգահեռ մոտեցման կիրառումը, Հայաստանի կողմից համապատասխան միջազգային պարտավորությունների և կոնվենցիաների շրջանակում պատասխանատվության խախտումը խոսում է էթնիկ զտումների քաղաքականությունն արդարացնելու մասին, որը պարբերաբար և նպատակաուղղված իրականացրել է Հայաստանը տասնամյակներ շարունակ»:
«Հայաստանի արտագործնախարարը պետք է հասկանա, որ Ղարաբաղի շրջանի հայ բնակիչների իրավունքները երբեք չեն կարող ավելի բարձր լինել, քան շրջանի ադրբեջանցի բնակիչների իրավունքները, իսկ Ադրբեջանը ձեռնարկում է և կձեռնարկի միայն իրավաչափ մոտեցումներ իր տարածքում ապրող ժողովուրդների էթնիկ զտումների նկատմամբ»,- ասվում է հայտարարության մեջ:
«Այն հանգամանքը, որ Հայաստանը, չհետևելով որևէ պայմանավորվածությունների և պարտավորությունների, մեղադրում է Ադրբեջանին մտացածին պայմանավորվածությունները հերքելու մեջ, խոսում է նրա մտադրության մասին՝ թաքցնելու սեփական հնարավոր սադրանքները: Հայաստանի այս ապակառուցողական գործողությունները պետք է դատապարտվեն և կանխվեն միջազգային հանրության կողմից»,- ասվում է հայտարարության մեջ:
Պատրաստեց Վիկտորյա ԱՆԴՐԵԱՍՅԱՆԸ
