«Ապրելու երկիր» կուսակցության նախագահ Մանե Թանդիլյանն այսօր լրագրողների հետ ճեպազրույցում անդրադարձավ հարցին, որ Հայաստանից Արցախ ուղարկվող հումանիտար բեռը մնացել է ճանապարհին, Ադրբեջանը թույլ չի տալիս, որ բեռները մտնեն Արցախ։
«Ես պարտավոր եմ նախ իմ գոհունակությունը հայտնել Հայաստանում հավատարմագրված միջազգային կառույցներին եւ դեսպաններին, ովքեր իրենց աջակցությունն ու մասնակցությունն են ցուցաբերում այս գործընթացին։ Սակայն, ցավոք սրտի, արդյունք չկա։ Բնական է, սա մեզ համար նորություն չէ, սպասելի էր։ Եվ մեզ համար տարօրինակ է, որ հիմա է նախաձեռնվում նման բան, այնինչ, գիտենք, որ հունիսի 15-ից առհասարակ ամբողջությամբ է Արցախը շրջափակված։ Եվ նաեւ մեր այսօրվա իշխանությունների հռետորաբանությունն ու վարքագիծն է պատճառը, որ այսօր նույն Ադրբեջանը հայտարարում է, որ դուք սադրում եք եւ փորձ եք կատարում մտնել մեր տարածք։ Ակնհայտ է, որ այսօրվա իշխանությունների հռետորաբանության հետեւանք են նաեւ նման հայտարարությունները»,- ասաց նա։
Մանե Թանդիլյանը նշեց, որ իրենց համար անակնկալ չէր, որ բեռները կանգնել են Կոռնիձորում, եւ թույլ չեն տալիս, որ մուտք գործեն Արցախ։ «Ես ուզում եմ առիթն օգտագործել եւ ասել, որ եթե որեւէ դեսպան կհամաձայնի ուղղաթիռով այս բեռները տեղափոխել, ես պատրաստ կլինեմ նստել այդ ուղղաթիռ եւ իրենց հետ միասին այդ բեռները տեղափոխել։ Ադրբեջանի հռետորաբանությունը լսում ենք եւ տեսնում ենք, որ դեռ երկար են կանգնելու։ Ես հույս չունեմ, որ Ադրբեջանը գալու է կառուցողական դաշտ եւ կուզենամ, որ որեւէ մեկն ուզենա այդ բեռները հասնեն տեղ այլ համաչափ գործողությունների միջոցով»,- նշեց նա։
Կարդացեք նաև
Հարցին, թե իր համար անհասկանալի չէ՞, թե ինչո՞ւ ռուս խաղաղապահները եւ Ադրբեջանը չեն արձագանքում այս իրավիճակում, Մանե Թանդիլյանը պատասխանեց․ «Անհասկանալի չէ, դա բնական է եւ օրինաչափ, որովհետեւ եթե մեր իշխանությունները հայտարարում են Արցախն Ադրբեջանի կազմում, ապա այդ պետություններն ըստ այդմ էլ գործողություններ են անում։ Նրանք էլ պնդում են, թե դուք մեզ հետ չեք համաձայնեցրել։ Նման հայտարարությունից հետո դու այլեւս կորցնում ես քո հնարավորությունները՝ կատարել գործողություններ»։
Ռոզա ՀՈՎՀԱՆՆԻՍՅԱՆ
