Հայաստանի դեմոկրատական կուսակցության փոխնախագահ Նարինե Դիլբարյանը «Հայելի» ակումբի ուղիղ եթերում, անդրադառնալով Նիկոլ Փաշինյանի վերջին ասուլիսին, նշեց, որ այն շատ կարեւոր նշանակություն ունեցավ, եւ այդ կարեւորությունը հետագայում մենք եւս կտեսնենք:
«Առաջին ասուլիսն էր, որտեղ հայ լրագրողները հայ հասարակության, իսկ Արցախը այդ առումով Հայաստան է, արցախցիներն էլ ՀՀ քաղաքացիների մի մասն են, հնչեցրին իրական կարծիքներ: Եվ ջարդվեց այն առասպելը, որին անկեղծ հավատում էր Նիկոլ Փաշինյանը, թե ինքը երկաթյա մանդատ ունի, որ այնքան են ատում թալանչիներին, նախկիններին կամ սեւերին, որ իրեն ամեն ինչ ներվում է: Լրագրողները հնչեցրին ժողովրդի ձայնը, որը ժամանակին մասնակցել եւ դեռ մասնակցելու է ընտրություններին: Նիկոլ Փաշինյանը տեսավ ամբողջ ցասումը, զայրույթը եւ իր մանդատի երերուն լինելը:
Ես շնորհավորում եմ հայաստանցի լրագրողներին, որոնք կարողացան Նիկոլ Փաշինյանին պարտադրել Հայաստանի եւ Արցախում ապրող մեր ՀՀ քաղաքացիների իրական կարծիքը: Իսկ Նիկոլ Փաշինյանի պոռթկումները, ինձ թվում է, այդ իրականության հետ առերեսումից հրաժարվելու թույլ եւ անզոր փորձ էր:
Համոզված եմ, որ ճնշումը, որ կազմակերպեցին լրագրողները՝ չորրորդ իշխանությունը, քաղաքացիական իշխանությունը, որն ամենազորեղ իշխանությունն է, նույնպես իր ձայնը պետք է բարձրացնի, ցույց տա որ 2021 թվականի արտահերթ ընտրություններին Նիկոլ Փաշինյանը, գլխավորելով ՔՊ կուսակցության ցուցակը, խոսում էր «անջատում հանուն փրկության» բանաձեւի մասին, խոսում էր Արցախի ժողովրդի ինքնորոշման իրավունքի իրացման, խոսում էր արցախյան հակամարտության հայանպաստ կարգավորման, ՀՀ սահմանների եւ ինքնիշխանության անխախտելիության մասին, չունի քվե: Հայաստանում ստեղծվել է մի իրավիճակ, որ բոլորովին այլ խոստումներով քաղաքական իշխանությունը պահպանած եւ քաղաքականության մեջ գոյատեւող ՔՊ-ն այլեւս կորցրել է իշխանություն լինելու եւ երկիրը հետագա պարտությունների առաջնորդելու իրավական, սահմանադրական եւ ընդհանրապես պետական բոլոր հիմքերը»,-ասաց տիկին Դիլբարյանը:
Կարդացեք նաև
Աշոտ ՀԱԿՈԲՅԱՆ
