«Կանայք հանուն Արցախի» խորագրով հացադուլը ՄԱԿ-ի գրասենյակի մոտ շարունակական բնույթ է կրում։ Այսօր մեկօրյա հացադուլին միացել են եւս երեք կանայք՝ ուղերձ հղելով հանրությանը, որ չպետք է անտարբեր լինել Արցախում տեղի ունեցող զարգացումների նկատմամբ։
Հացադուլ հայտարարած կանանցից Ստելլա Ավագյանը «Առավոտ»-ի հետ զրույցում ասաց, որ իր քայլով ուզում է առաջին հերթին մարդկանց զգոնությունը բարձրացնել, քանի որ Արցախում ճգնաժամային օրեր են սկսվել։ «Եթե այսպես շարունակվի, մենք վատ իրադարձությունների պետք է պատրաստվենք, կոնկրետ ֆիզիկական կորուստների։ Իմ այս քայլով ուզում եմ կոչ անել, որ մարդիկ իրենց մի քիչ նեղություն տան, փորձեն հասկանալ, թե իրականում ինչ է կատարվում, որովհետեւ շատերը փորձում են անջատվել իրականությունից, ապրումակցում չկա մեր հայրենակիցների հանդեպ։ Մարդիկ անջատվել են այս իրականությունից ու ասում են՝ մեզ մի անհանգստացրեք, թողեք մենք մեր կյանքով ապրենք, ոչինչ չենք ուզում լսել։ Ես կոչ եմ անում, որ մարդիկ վերջապես հասկանան՝ սա մեր լինելիության հարցն է, պետք է համախմբվել ու հասկանալ ինչ անել, որովհետեւ եթե այսպես շարունակվի, մենք բացի տարածքային կորուստից, նաեւ կունենանք մարդկային կյանքների կորուստ։ Ես վստահ եմ, որ իմ երեխաները պատմական այս իրավիճակն ուսումնասիրելիս ասելու են՝ լավ, բա դուք ո՞ւր էիք։ Ես այդ հարցի պատասխանից ելնելով՝ այս քայլին եմ դիմում, որովհետեւ չեմ ուզում մաս կազմել այն անտարբեր զանգվածի, որը միայն առօրյա կենցաղային կարիքները հոգալու մասին է մտածում»,- ասաց Ստելլան։
Նա նշեց, որ շատ հնարավոր է, որ, ապրելով Երեւանում, վաղը բոլորս հայտնվենք այն վիճակում, որում այսօր արցախցիներն են։ «Ես տեսնում եմ, որ այսօր արցախցին իմ ապագայի համար է պայքարում։ Այսինքն՝ այն, ինչի միջով նա անցնում է, նույնը կարող է մեզ հետ լինել։ Ես մի բան են նկատել, մինչեւ այս մարտահրավերը չհայտնվի յուրաքանչյուրի դռանը, մարդիկ իրենց տեղից չեն շարժվի։ Բայց եկեք թույլ չտանք, որ իրավիճակը հասնի դրան։ Ես հույս ու ցանկություն ունեմ, որ համախմբում կլինի, եւ վերջապես մեր ազգը ժողովրդի մակարդակից կդառնա ազգ ու կհասկանանք՝ այս ի՞նչ ենք անում, ո՞ւր ենք գնում եւ ինչպե՞ս ենք իներցիայով անդունդը գլորվում»,- հավելեց մեր զրուցակիցը։
Ռոզա ՀՈՎՀԱՆՆԻՍՅԱՆ
Կարդացեք նաև
Լուսանկարը՝ Անուշ Սեդրակյանի ֆեյսբուքյան էջից
