Հարավային Կովկասի գործերին ՆԱՏՕ-ի ներգրավվածությունը կապակայունացնի տարածաշրջանը և երկար ժամանակով կհեռացնի լիարժեք, լիաֆորմատ խաղաղության կարգավորումը: Այսօր տեղի ունեցած ճեպազրույցում նման հայտարարություն է արել Ռուսաստանի ԱԳՆ խոսնակ Մարիա Զախարովան՝ մեկնաբանելով հայ բարձրաստիճան պաշտոնյաների շփումները Պենտագոնի հետ:
Զախարովան նշել է, որ ՆԱՏՕ-ի երկրները, այդ թվում ԱՄՆ-ը և Թուրքիան, բարձր հետաքրքրություն են ցուցաբերում Հարավային Կովկասում: Նա նաև ոչ պատահական է համարել Կանադայի ներկայացուցիչների միանալը Հայաստանում ԵՄ առաքելությանը:
«Հայաստանում կանադացիների երևալն ամենավառ կերպով ցույց է տալիս, որ ԵՄ-ը, լիարժեք կորցնելով արտաքին քաղաքական ինքնուրույնությունը, զբաղվում է ԱՄՆ-ի և ՆԱՏՕ-ի շահերի սպասարկմամբ»,- ասել է Զախարովան:
Նրա խոսքով՝ դա նաև բացատրում է, թե ինչու ԵՄ մոտ 100 հոգանոց առաքելությանը պետք եկան «մի քանի կանադացի փորձագետներ, և թե ինչ մասնագետներ են դրանք՝ մենք գուշակում ենք»:
Կարդացեք նաև
Ռուսաստանի ԱԳՆ խոսնակը նշել է, որ իրենք լավ տեղեկացված են կանադական խաղաղարարրւթյան առանձնահատկություններին, քանի որ «Կանադայից այդպիսի մասնագետները 2015թ-ից ակտիվորեն պատրաստում էին ուկրաինացի զինյալներ Unifier օպերացիայի շրջանակում»:
Պատրաստեց Վիկտորյա ԱՆԴՐԵԱՍՅԱՆԸ
