Վարչապետ Նիկոլ Փաշինյանի ասուլիսում Արցախի Ազգային ժողովի պատգամավոր Մետաքսե Հակոբյանը լրագրողի միջոցով հարց ուղղեց Փաշինյանին։ «2018 թվականի իշխանափոխության եւ ձեր վարած քաղաքականության հետեւանքով ահասարսուռ պատերազմ ստացանք, նահատակվեցին հազարավոր հերոսներ, տասնյակ հազարավոր կյանքեր ու ճակատագրեր խեղվեցին, հանձնվեց մեր հայրենիքի մեծ մասը։ Եվ հետո խրոխտ հայտարարեցիք, որ այլեւս Արցախի Հանրապետության անվտանգության երաշխավորը չեք։ Դուք նույնիսկ Հայաստանի անվտանգության երաշխավորը չեք։
Միաժամանակ ճանաչեցիք Ադրբեջանի տարածքային ամբողջականությունը՝ հատուկ նշելով, որ Արցախը ճանաչում եք Ադրբեջանի մաս։ Իսկ ո՞վ է ձեզ իրավունք տվել չեղարկել Արցախի բնիկ ժողովրդի ինքնորոշման իրավունքը։ Որտեղի՞ց ձեզ իրավունք՝ Լեռնային Ղարաբաղի տարածքը, որը դեռեւս Ազգերի լիգան է վիճելի տարածք ճանաչել, համարել Ադրբեջանի մաս։ Ո՞վ եք դուք, որ Արցախը դնեք սակարկման։ Եվ այս ամենը բերել հասցրել եք ընդամենը հումանիտար խնդիրների դաշտ՝ օգտագործելով Աղդամ-Ստեփանակերտ ճանապարհը։ Ես առաջարկ ունեմ ձեզ՝ օգտվել այդ ճանապարհից ու այդ հումանիտար բեռներից եւ այն տեղափոխեք ձեր եւ ձեր թիմի այն անդամների խոհանոցներ, ովքեր կիսում են ձեր այս բոլոր տեսակետները»,- նշեց Մետաքսե Հակոբյանը։
Նա նշեց, որ որպես Արցախի Հանրապետության Ազգային ժողովի պատգամավոր, ով օժտված է լիազորություններով, արգելում է Նիկոլ Փաշինյանին այսուհետ չեղարկել կամ նույնիսկ փորձ անել կասկածի տակ դնել արցախցիների ինքնորոշման իրավունքը։ «Ով է ձեզ տվել իրավունք, առաջարկում եմ ասել իրավունք տվողների անունը, որ դուք կարող եք Արցախը որպես մանրադրամ օգտագործել։ Եվ, ի վերջո, ձեր այդ քայլերի արդյունքում ինչ է շահել կամ շահելու Հայաստանի Հանրապետությունը»
Նիկոլ Փաշինյանը չպատասխանեց Մետաքսե Հակոբյանի հարցին։ «Տարբեր դրվագներով՝ սկսած խոհանոցից մինչեւ ինքնորոշման իրավունք, արդեն բազմիցս պատասխանել եմ, ավելացնելու բան չեմ տեսնում։ Եվ ես էլի ասում եմ, որ համաձայն եմ՝ ես Լեռնային Ղարաբաղի ժողովրդի հարցը պետք է չորոշեմ, եւ ԼՂ ժողովրդի հարցը պետք է որոշեն ԼՂ ժողովրդի ներկայացուցիչները»,- ասաց Փաշինյանը։
Կարդացեք նաև
Ռոզա ՀՈՎՀԱՆՆԻՍՅԱՆ
