Այսօր հրավիրած ասուլիսում վարչապետ Նիկոլ Փաշինյանին հարցրեցին՝ նշեցիք, որ բրյուսելյան բանակցություններում Աղդամի ճանապարհի հարցը չի քննարկվել, այդ դեպքում ինչո՞ւ են եվրոպացի պաշտոնյաները դա նշում ու սա չի՞ նշանակում, որ անկախ ձեր ցանկությունից ՝ այդ հարցն օրակարգում է, ինչո՞ւ պաշտոնական Երեւանը չարձագանքեց այդ հայտարարություններին որեւէ կերպ: Բացի այդ, նույն բրյուսելյան բանակցություններում, ըստ ադրբեջանական ԶԼՄ-ների, քննարկվել է նաեւ արեւմտյան ադրբեջանցիների՝ Ստեփանակերտ վերադարձի հարցը:
Փաշինյանը պատասխանեց. «Երբ խոսվել է ԼՂ հայության իրավունքների եւ անվտանգության հասցեագրման հարցը եւ այն, որ դա պետք է տեղի ունենա Բաքու-Ստեփանակերտ ճանապարհով, Ադրբեջանը իր հերթին բարձրացնում է հարց, որ այդ դեպքում Խորհրդային Հայաստանից հեռացած ադրբեջանցիների իրավունքների եւ անվտանգության հարցը եւս պետք է հասցեագրվի: Մեր արձագանքը եղել եւ շարունակում է մնալ, որ ժամանակին Հայաստանում ապրած ադրբեջանցիների թեման համարժեք չէ: Եթե կա այդպիսի թեմա, այն համարժեք է Բաքվից, Սումգայիթից, Գյանջայից, Նախիջեւանից հայերի իրավունքների եւ անվտանգության թեմային»:
Հարցին՝ ինչո՞ւ Շառլ Միշելի ու Տոյվո Կլաարի ասածներին որեւէ կերպ չարձագանքեցիք՝ նա պատասխանեց, որ մանդատ չունենք այդ հարցը քննարկել, մենք քննարկում ենք այն հարցը, որը վերաբերում է մեզ, մենք նման հարց քննարկելու մանդատ չունենք:
Հռիփսիմե ՋԵԲԵՋՅԱՆ
