Այսօրվա ասուլիսում վարչապետ Նիկոլ Փաշինյանն անդրադարձավ հարցին, թե ի՞նչ իրավունքով են ինքն ու իր թիմը որոշում հազարամյա Արցախի ճակատագիրը, այն դեպքում, երբ այլ թեզերով են եկել իշխանության։ Հարցին, թե ինչո՞ւ հանրաքվե չեն իրականացնում՝ պարզելու, թե արդյոք ժողովուրդը համաձայն է, որ Արցախը ճանաչվի Ադրբեջանի կազմում, Նիկոլ Փաշինյանը պատասխանեց․ «Ի՞նչ վերաբերում է ժողովրդի հետ քննարկելուն, բա հիմա մենք ի՞նչ ենք անում։ Այստեղ այս ասուլիսները կազմակերպվում են, ուղիղ եթերում հեռարձակվում է, եւ այդ ժանրի կարեւոր նպատակներից մեկը ժողովրդի հետ քննարկում ունենալն է։ Հենց սա էլ է ժողովրդի հետ քննարկում։ Քննիչ հանձնաժողովում 6-7 ժամ ես պատասխանում եմ հարցերի, ինչ-որ փաստերի եւ փաստարկների մասին եմ խոսում, դա ինչի՞ մասին է, դա էլ է ժողովրդի հետ քննարկում։ Եվ ի վերջո, ես նաեւ ասացի, որ չենք կարծում, թե կարող ենք ԼՂ ժողովրդի ճակատագիրը որոշել։ Եվ այդ է պատճառը, որ մենք կարծում ենք, որ ԼՂ ժողովրդի ճակատագիրն ինքը՝ ԼՂ ժողովուրդը պետք է որոշի։ Հարցերից մեկն այն մասին էր, որ ես մանդատ ունեմ՝ որոշումներ կայացնելու Հայաստանի հանրապետության վերաբերյալ»։
Փաշինյանը հավելեց, որ հարցերի հայելային էֆեկտը պետք է անպայման հաշվի առնել ու նկատի ունենալ։ «Հայաստանի Հանրապետության ժողովուրդը համաձա՞յն է, որ Ադրբեջանը ճանաչի Հայաստանի 29․8 հազար քկմ տարածքային ամբողջականությունը։ Սրա մասին է խոսքը։ Եթե որեւէ մեկը կարծում է, որ ՀՀ ժողովուրդը համաձայն չէ, որ 29․8 հազար քկմ տարածքային ամբողջականությունը ճանաչվի, թող ասի՝ ես համաձայն չեմ։ Այդ թվում՝ ընդդիմությունը, ոչ ընդդիմությունը, ոմանք այնպիսի տպավորություն են ստեղծում, թե ես առավոտից իրիկուն քնում-արթնանում եմ, մտածում եմ, թե ոնց անեմ, որ Ադրբեջանի տարածքային ամբողջականությունը ճանաչեմ։ Սա սխալ ընկալում է, որովհետեւ ես չեմ մտածում Ադրբեջանի տարածքային ամբողջականության մասին, ես մտածում եմ, Հայաստանի տարածքային ամբողջականության մասին։ Եթե որեւէ մեկը գտնում է, որ սա չպիտի լինի իմ գործունեության նպատակը՝ որպես ՀՀ վարչապետ, ես դա հերքում եմ։ Դուք ասում եք՝ ի՞նչ իրավունք ունեք որոշելու ԼՂ ճակատագիրը, ես ասում եմ՝ ես ժողովրդի կողմից ինձ տրված մանդատով իրավունք ունեմ որոշել Հայաստանի Հանրապետության ճակատագիրը։ Եվ ՀՀ-ն է իմ գործունեության օբյեկտը, Լեռնային Ղարաբաղի ժողովրդի իրավունքներն ու անվտանգություն առնչվո՞ւմ է այդ թեմային, իհարկե, առնչվում է։ Բայց գործունեության ֆոկուսը Հայաստանի Հանրապետությունն է»,- ասաց Փաշինյանը։
Նա նաեւ հավելեց․ «Քաղաքացին չգիտի՝ 29․8 հազար քկմ-ն ի՞նչ է, օրինակ, Կապան քաղաքը դրա մեջ մտնում է, թե՞ չի մտնում, Տավուշի մարզը մտնում է, թե՞ չի մտնում, Արծվաշենը դրա մեջ մտնում է, թե՞ չի մտնում»։
Կարդացեք նաև
Ռոզա ՀՈՎՀԱՆՆԻՍՅԱՆ
