ՀՀ էկոնոմիկայի նախարարության զբոսաշրջության կոմիտեի աջակցությամբ, Լոռու մարզպետարանի հետ համագոյակցությամբ այս տարի «Ուտելի բույսերի փառատոնն» անցկացվեց հուլիսի 22-ին՝ Լոռվա չնաշխարհիկ Դսեղ գյուղում։
Արդեն չորրորդ անգամ Ուտելի բույսերի փառատոնը կազմակերպվում է ՀԿ կենտրոնի կողմից։ Այս տարի «Ուտելի բույսերի փառատոնի» կարգախոսն է՝ «Արի՛ Լոռի, գնանք քոլի»։
Միջոցառմանը ներկա էին և իրենց ու մարզպետ Արամ Խաչատրյանի ողջույններն էին բերել Լոռու մարզպետի տեղակալ Գոռ Ասրյանը, մարզպետի խորհրդական Տիգրան Հովսեփյանը:
Փառատոնին մասնակցում էին բազմաթիվ հյուրեր, զբոսաշրջիկներ:
Նրանք շրջեցին տաղավարներով, համտեսեցին բազմազան ուտեստները, ներկա գտնվեցին վարպետաց դասերին:
Գոռ Ասրյանն իր խոսքում կարևորեց նման փառատոների կազմակերպումը զբոսաշրջային հոսքերի ակտիվացման, Լոռու չքնաղ բնությունը, ավանդույթներն աշխարհին ճանաչելի դարձնելու առումով:
Կարդացեք նաև
– Լոռու մարզպետարանը մշտապես պատրաստ է աջակցելու բոլոր ողջունելի նախաձեռնություններին: Նմանատիպ միջոցառումներն ակտիվություն են մտցնում մարզում, շատ զբոսաշրջիկներ բերում, ինչն էլ իր հերթին, շղթայական կերպով, տնտեսական ակտիվություն է առաջացնում,-ասաց Գ. Ասրյանը:
Տիգրան Հովսեփյանն իր խոսքում նշեց, որ Լոռու մարզպետարանը սիրով համագործակցել է ՀԿ կենտրոնի հետ այս գեղեցիկ փառատոնի կազմակերպման հարցում:
-Ես առիթ եմ ունեցել իմ խոսքում նշելու, որ այս փառատոնը սիրո փառատոն է և այսօր Դսեղում շատ սեր կա, սեր մեկմեկու, հայրենիքի նկատմամբ, մեր բնօրրանի ամեն մի ծառի ու թփի նկատմամբ: Եթե շատ սեր լինի, մեզնից յուրաքանչյուրի մոտ ամեն ինչ շատ ավելի լավ կստացվի,-ասաց նա:
Ողջույնի խոսքով հանդես եկավ նաև «ՀԿ Կենտրոն» քաղաքացիական հասարակության զարգացման ՀԿ-ի նախագահ Արփինե Հակոբյանը: Անդրադառնալով փառատոնի կազմակերպման նախաձեռնությանը՝ նա նշեց, որ նպատակը եղել է լոռեցիների կենցաղային առանձնահատկությունները ներկայացնել աշխարհին և դրանցից մեկը լոռեցիների կողմից ուտելի բույսերի շատ օգտագործումն է խոհանոցում:
Ինչպես հայտնի է, Լոռին հարուստ է բուսատեսակների բազմազանությամբ և դրա օգտագործմամբ՝ խոհանոցում։ Տեղացիները պահպանել են հավաքչության ավանդույթը և ամեն գարուն-ամառ գնում են հավաքի և ուտելի խոտաբույսերից պատրաստում յուրահատուկ ու համեղ կերակուրներ, և հենց այս ամենով էլ պայմանավորված՝ լոռեցիներին անվանում են «քոլեցի»։
ՀՀ էկոնոմիկայի նախարարության Զբոսաշրջային կոմիտեի մարքեթինգի և խթանման բաժնի ղեկավար Հայկանուշ Սահակյանը կոմիտեի անունից նույնպես ողջունեց միջոցառումը և նշեց, որ սիրով աջակցություն է ցուցաբերվել փառատոնի կազմակերպմանը:
Փառատոնի շրջանակներում անցկացվեցին ազգային և մշակույթային միջոցառումներ, լոռեցիների ձեռքով հավաքած, մշակված և պատրաստված բուսական ուտեստների չորացված ու պահածոյացված բույսերի համտես և վաճառք, վարպետաց դասեր,
ուտեստի համտես-հյուրասիրություն,
քայլարշավներ՝ վայրի հավաքչության կանոնների ուսուցմամբ ու պատմությամբ,
ժողովրդական խաղերի ուսուցում,
ազգային երգ ու պարի ուսուցում։
ՀԿ կենտրոնի կողմից Լոռու մարզպետարանին՝ ի դեմս մարզպետ Արամ Խաչատրյանի և մարզպետի խորհրդական Տիգրան Հովսեփյանին հանձնվեցին շնորհակալագրեր՝ «Ուտելի բույսերի փառատոնի» կայացման գործում ունեցած անգնահատելի ներդրման և մասնակցության համար:
Լոռու մարզպետի աշխատակազմ
