Սիրելի՛ համագյուղացիներ, հարգելի՛ խնձորեսկաբնակներ,
Ես, լինելով ձեզնից մեկը, իմ պաշտոնավարումը, որպես վարչական ղեկավար, սկսել եմ պետության համար դժվար ժամանակներում, որն ուղեկցվեց ավելի լուրջ իրադարձություններով և բեկում մտցրեց բոլորիս կյանքում:
Երեք տարիների ընթացքում արել եմ անհնարինը՝ գյուղի խնդիրները լուծելու, անվտանգությունն ապահովելու և գյուղացու բողոքի ձայնը լսելի դարձնելու ու անպատասխան չթողնելու համար:
Կարդացեք նաև
Շնորհակալ եմ բոլորիդ՝ ինձ ընդունելու և չընդունելու, հավատարիմ և դավաճան լինելու, երախտապարտ և երախտամոռ լինելու, հայրենասեր և հայրենանվեր լինելու համար (ո՛չ երբեք անհայրենիքներին):
Առանձնահատուկ շնորհակալություն իմ մարտական և զինակից ընկերներին, ովքեր վերցրել և միշտ պատրաստ են զենք վերցնել՝ հանուն հայրենիքի և հայի ազատության, այն մի քանի ընտանիքներին, որ գիշեր-ցերեկ եղել են գյուղի և գյուղացու խնդիրների կողքին և իմ գործընկերներ Լիլիթին, Էդիկին, Ջիվանին ու Հասմիկին:
Շնորհակալություն, որ ապրում եք սահմանին շատ մոտ, չեք լքում ու պայքարում եք հայրենի գյուղի համար, իսկ հայրենիքից հեռու ապրողներին, որ չեք մոռանում ծննդավայրը և կանգնած եք գյուղի կողքին:
Ես, որպես Երվանդ, շարունակելու եմ իմ՝ Խնձորեսկասեր և Խնձորեսկանպաստ գործունեությունը:
Հ.Գ. Անկախ ամեն ինչից՝ ես նույն Երվանդն եմ. անհրաժեշտության դեպքում՝ կարող եք դիմել, միշտ պատրաստ եմ օգնել:
Երվանդ ՄԱԼՈԻՆՑ
Խնձորեսկի գյուղապետ
