Հուլիսի 20-ից արդեն 3 օր է, ինչ տավուշցիներն ապրում են մշակութային հագեցած կյանքով: Իջևան, Աչաջուր և Բերքաբեր համայնքներում թևածում է երգ-երաժշտությունը` ուղեկցվելով նաև բազմաթիվ ցուցահանդեսներով:
Իջևան բազմաբնակավայր համայնքում «Մենք ենք մեր սարերը» ծրագրի հայեցակարգային մտահղացմամբ կազմակերպվել է եռօրյա փառատոն, որին մասնակցում են համայնքի բնակիչները։ Իջևանի համայնքապետ Արթուր Ճաղարյանն Aravot.am-ի հետ զրույցում նշեց, որ սա մեծ և սպասված իրադարձություն է համայնքի համար:
«Ինչպես գիտեք, Իջևան խոշորացված համայնքն արժանացել է 300․000 եվրո դրամաշնորհի «ԵՄ-ն՝ հանուն մշակութային զարգացման» ծրագրի շրջանակում՝ դառնալով EU4Culture ծրագրի հաղթող։ Հենց այդ ծրագրի շրջանակներում էլ կազմակերպվել է փառատոնը: Այն նպատակ ունի նախաձեռնությունների շնորհիվ զարգացնել Իջևան բազմաբնակավայր համայնքի մշակութային և տնտեսական գործուն կյանքն ու ապահովել համագործակցային և մշակութային տնտեսության զարգացում։ Հռչակավոր Մակարավանքի տարածքում հուլիսի 21-ին վաղ առավոտից մեկնարկեց համաիջևանյան տոնակատարության 2-րդ օրը։ Իջևան համայնքի բնակավայրերի արտադրողները իրենց բերքն ու բարիքը, արհեստագործական, ձեռարվեստի և հուշանվերային աշխատանքները ցուցահանդես-վաճառքի նպատակով ներկայացրին Աչաջուր գյուղում։ Այսօր արդեն միջոցառումը շարունակվում է Բերքաբեր բնակավայրում: Լիահույս եմ, որ այս ամենը կլինի շարունակական»,-նշեց Ճաղարյանը:
Կարդացեք նաև
Լիա ՃԱՂԱՐՅԱՆ
