«Հայաքվե» նախաձեռնության համակարգող Ավետիք Չալաբյանն այսօր հրավիրած ասուլիսում անդրադարձավ հարցին, թե ստորագրահավաքից հետո ի՞նչ ակնկալիք ունեն Ազգային ժողովից, որտեղ մեծամասնությունը «Քաղաքացիական պայմանագիր» խմբակցությունն է։ Հիշեցնենք, ստորագրահավաքից հետո նախաձեռնության հեղինակներն Ազգային ժողով են ներկայացնելու Քրեական օրենսգրքում լրացում կատարելու նախագիծը, որով առաջարկում են քրեական պատիժ սահմանել Արցախն այլ երկրի հանձնելու համար։
«Հարցի մեջ իրականում թվացյալ ճշմարտություն կա, որ «Քաղաքացիական պայմանագիրը» պետք է դեմ քվեարկի «Հայաքվե»-ին։ Բայց դա բոլորովին էլ փաստ չէ, որովհետեւ «Քաղաքացիական պայմանագիրը» բաղկացած է 70 մարդուց, եւ որպես ամբողջություն՝ իրենք դեմ չեն արտահայտվում, դեմ են արտահայտվում կոնկրետ գործիչներ։ Եվ իրենք դեմ են արտահայտվում ոչ թե, որ չեն քվեարկելու, այլ որովհետեւ ուզում են ձախողել ստորագրահավաքը։ Բայց հենց ստորագրահավաքի փուլն ավարտվի, եւ ակնհայտ դառնա, որ մենք ունենք մեր քաղաքացիների աջակցությունը, ես համոզված եմ, որ հենց «Քաղաքացիական պայմանագրի» ներսում կսկսեն շատ լուրջ եւ քննարկումներ, եւ երկմտանք, եւ ճեղքվածք կառաջանա։ Ընդհանուր առմամբ, մեզ պետք է, որ ՔՊ-ից 20 պատգամավոր կողմ քվեարկի, եւ մենք աշխատելու ենք նրա վրա, որ 20 պատգամավորը քվեարկի»,- ասաց նա։
Ըստ Չալաբյանի՝ ՔՊ-ն իր խորհրդի, վարչության կամ ղեկավարի մակարդակով չի արտահայտվել։ «Ուստի, հիմա իրենք դիմադրում են, բայց բազմաթիվ են մեր պատմության մեջ օրինակները, երբ իշխող քաղաքական թիմն ինչ-որ բանի դիմադրում է, հետո համաձայնում է։ Եվ մենք մեր բոլոր ջանքերը գործադրելու ենք, որպեսզի «Քաղաքացիական պայմանագրի» դիմադրությունը հաղթահարենք։ Ինչպես հիմա ենք իրենց դիմադրում, այնպես էլ հետագայում կդիմադրենք»,- ասաց Չալաբյանը։
Կարդացեք նաև
Ռոզա ՀՈՎՀԱՆՆԻՍՅԱՆ
