Ադրբեջանական ապօրինի շրջափակման արդյունքում Արցախում ստեղծված օրհասական վիճակը միջազգային հանրությանը ներկայացնելու նպատակով Արցախում, ինչպես նաև Հայաստանում, մեկնարկել է համաժողովրդական շարժում: Սփյուռքում, սակայն, համարժեք միջոցառումներ դեռևս չեն սկսել:
«Սփյուռքում մեր հայրենակիցները շատ բան կարող են անել», – Լեռնային Ղարաբաղն ապաշրջափակելու գործողություններում Սփյուռքի ներգրավվածության առնչությամբ Aravot.am-ի հետ զրույցում նշում է ԼՂ պետական նախարար Գուրգեն Ներսիսյանը, մանրամասնում նաև, թե ինչ գործողություններ կարող են իրականացնել արտասահմանում բնակվող հայերը. «Անհրաժեշտ է դիմել հյուրընկալ երկրների կառավարություններին, ներկայացնել Արցախում ստեղծված իրավիճակը և պահանջել, որ որպես միջազգային հանրության մաս՝ իրենց բաժին պատասխանատվությունը ստանձնեն ցեղասպանության եզրին գտնվող Արցախի ժողովրդի հանդեպ», – ասում է նա:
Պետական նախարարն ընդգծում է՝ Սփյուռքի հայությունը չի իրացնում իր ամբողջ ներուժն արցախահայության առջև ծառացած ճգնաժամը հաղթահարելու համար:
«Թե Սփյուռքի մեր հայրենակիցներն ինչպես են մտահոգվում Արցախի հայերի համար, ես, անկեղծ ասած, չգիտեմ: Այդ մտահոգությունը նկատելի կլիներ, եթե հիմա մեր քույրերն ու եղբայրներն ամեն օր ամենատարբեր ակցիաները կազմակերպեին ու բոլորի ուշադրությունը հրավիրեին խնդրին, ՄԱԿ-ին պահանջ ներկայացնեին, պահանջեին միջոցներ ձեռնարկել Մարդու իրավունքների եվրոպական դատարանի և Հաագայի դատարանի դատական ակտերի կատարումն ապահովելու ուղղությամբ, մինչդեռ այդ նպատակով որևէ քայլ չենք տեսնում», – նկատում է նախարար Ներսիսյանը, շեշտում՝ Սփյուռքի ներգրավվածությունը կարևոր է, քանի որ այն ոգեշնչում է պաշարված Արցախի ժողովրդին: «Հավատացեք, ձեր ամենափոքրիկ քայլը մեծ հույս է ներշնչում Արցախում ապրող մեր ժողովրդի համար, նրանք էլ ավելի են ոգևորվում և էլ ավելի մեծ համառությամբ են սկսում հաղթահարել այն խնդիրները, որոնց մեջ ապրում ենք նորածնից մինչև ամենատարեց», – հավելում է Գուրգեն Ներսիսյանը:
Կարդացեք նաև
Aravot.am-ի հարցին՝ ի՞նչ ուղերձ կհղեք արտասահմանում այս հոդվածն ընթերցողներին՝ թե՛ հայերին, թե՛ այլազգիներին, նախարարը պատասխանեց.
«Այս հոդվածն ընթերցողներին կխնդրեմ տեր կանգնել Արցախին ու Արցախի ժողովրդին, ստանձնել պատասխանատվություն: Եթե ձեր կյանքից ընդամենը մեկ ժամ հատկացնեք այդ գործին, դա արդեն աջակցություն է: Վաղը բոլորդ զղջալու եք ձեր անգործության համար, բայց արդեն ուշ է լինելու: Արցախցին լրջագույն աղետի առաջ է կանգնած, բայց ինչպես տեսնում եք, չի հանձնվում: Մի նպաստեք արցախցու հյուծմանը, աջակցեք մեր ժողովրդին և կտեսնեք, թե ինչպես է իրավիճակը փոփոխվում դրական իմաստով: Անհուսալի ոչինչ չկա, ուղղակի պետք է պատասխանատվություն ստանձնել: Եթե 90-ականներին մեր սփյուռքահայերը մեզ օգնելու համար պետք է զինված մեկնեին մարտի դաշտ, հիմա դրա կարիքը չկա, մարտնչեք ձեր երկրներում, խաղաղ ցույցերի կազմակերպմամբ ու պահանաջատիրությամբ»:
Մեզ հետ զրուցելիս, պետական նախարար Գուրգեն Ներսիսյանը նշեց՝ Արցախն այս պահին շնչահեղձ է լինում:
Արսեն ԱՅՎԱԶՅԱՆ
Լուսանկարը՝ Գուրգեն Ներսիսյանի ՖԲ էջից
