Ստեղծված աղետալի իրավիճակի իրական դրդապատճառների ու պատասխանատվություն կրողների նկատմամբ Արցախի իշխանությունների անհամարժեք արձագանքը քանիցս քննադատության է արժանացել «Արցախի անվտանգության ու զարգացման ճակատի» կողմից: Շարժումը բազմիցս ընդգծել է, որ նման կեցվածքն անհեռանկարային է ու համախմբման համար անկեղծ դիրքորոշում չի կարող դիտվել:
Կարևոր ենք համարում, որ ԱՀ պետնախարարի հրապարակային խոսքում արդեն հնչում են հասցեական շեշտադրումներ, որոնք իրերն իրենց անուններով կոչելու ուղերձ ունեն:
Ողջունելի ենք համարում երեկ Հայաստանի հանրային հեռուստատեսության եթերում Պետրոս Ղազարյանի հեղինակային «Հարցազրույց» ծրագրի շրջանակներում Գուրգեն Ներսիսյանի հնչեցրած մտքերը կապված Արցախի շուրջ համազգային համախմբման անհետաձգելիության հետ: Քանի դեռ ՀՀ իշխանությունները հստակ չեն արձանագրում, որ Արցախը եւ Արցախի ժողովուրդը Ադրբեջանի կազմում չեն կարող գոյություն ունենալ եւ համարժեք քայլեր չեն ձեռնարկում, վերահաս աղետը լինելու է համընդհանուր: Պետնախարարի նման շեշտադրումն ամբողջությամբ արտացոլում է Արցախի ժողովրդի կամքն ու սպասումը:
Ակնկալում ենք, որ հասցեական հայտարարությունները պետք է ամրագրվեն հետևյալ անհրաժեշտ քայլերով.
Կարդացեք նաև
🔸ՀՀ իշխանություններից պահանջել Հայաստանի ու Ադրբեջանի միջև վերջին հինգ տարիների բանակցային պատմության ողջ փաթեթը;
🔸Բացառել Արցախի Հանրապետության անունից որևէ փաստաթղթի ստորագրում առանց Արցախի ժողովրդի համաձայնության;
🔸Հստակեցնել Հայաստանի Հանրապետության հետ ներկա հարաբերությունների կարգավիճակը;
🔸Կոնկրետացնել Արցախի Հանրապետություն-Ադրբեջանի Հանրապետություն բանակցային ձևաչափի, երրորդ կողմի, մասնակիցների, օրակարգի և վայրի հետ կապված հարցերը;
🔸Պաշտոնապես հայտարարել «Հայաքվե» նախաձեռնությանը ԱՀ իշխանությունների աջակցության մասին;
🔸Պահանջել նոր եռակողմ՝ Արցախի Հանրապետություն- Ռուսաստանի Դաշնություն-Ադրբեջանի Հանրապետություն համաձայնագրի ստորագրում;
🔸Ակտիվացնել Արցախի Հանրապետության ճանաչման գործընթացն այլ երկրների կողմից;
🔸Բացառել անկումային տրամադրություններին նպաստող քայլերը` արթուն պահելով ժողովրդի պայքարի ոգին:
«Արցախի անվտանգության եւ զարգացման ճակատ» հանրային շարժումը պատրաստ է սատարելու՝ հանուն Արցախի բոլոր առողջ ուժերի պայքարի նախաձեռնություններին:
Արցախի անվտանգության և զարգացման ճակատ
