Վերջերս Նորք-Մարաշի փողոցներից մեկն անվանակոչվեց Կոմիտասի, հայ հոգեւոր երգերի ու տաղերի անկրկնելի կատարող Լուսինե Զաքարյանի անունով: Այն նվեր էր լուսապայծառ երջանկահիշատակ երգչուհու ծննդյան օրվա առթիվ։ Լուսինե Զաքարյանի եւ Խորեն Պալյանի տանն այդ օրը ստվար բազմություն կար։ Հատուկ ժամանել էր ԱՄՆ-ից թանգարան վերաստեղծողը՝ բժիշկ Րաֆֆի Պալյանը՝ Խորեն Պալյանի եղբորորդին, ով իր ուսումնառության տարիներին 8 տարի հյուրընկալվել է այս տանը։
Թանգարանի տնօրեն Սուսաննա Դավթյանը կազմակերպել էր համերգային ծրագիր, որի ընթացքում ելույթ ունեցան կրթաթոշակակիրները՝ Ազնավուրի անվան ջազ, Առնո Բաբաջանյանի անվան երաժշտամանկավարժական, Ռոմանոս Մելիքյանի անվան երաժշտական քոլեջներից, Երեւանի Կոմիտասի անվան պետական կոնսերվատորիայից։ Ի թիվս այլոց, ներկա էր նաեւ երաժշտագետ Գոհար Շագոյանը։ Օպերային երգչուհի, միջազգային մրցույթների դափնեկիր Դիանա Հարությունյանն ու կոնցերտմայստեր, ԵՊԿ պրոֆեսոր Մարգարիտա Սարգսյանը ներկայացրին «Նվիրում Լուսինեին» վոկալ շարքից:
Լարիաննա ՆԵՐՍԻՍՅԱՆ
«Առավոտ» օրաթերթ
14.07.2023
