Խոսքի ազատության պաշտպանության կոմիտեի փորձագետ Հասմիկ Բուդաղյանը ֆեյսբուքի իր էջում գրել էր, որ հունիսի 28-ին Oragir.news կայքի գլխավոր խմբագիր Գևորգ Էմին-Տերյանի վերաբերյալ քրեական վարույթով Երևան քաղաքի Կենտրոն և Նորք-Մարաշ վարչական շրջանների դատախազությունում ստացվել է քննիչի միջնորդությունը՝ նրա նկատմամբ հանրային քրեական հետապնդումը դադարեցնելու մասին, որը հսկող դատախազի՝ հունիսի 29-ի որոշմամբ բավարարվել է։ Այս մասին Խոսքի ազատության պաշտպանության կոմիտե – CPFE-ի հարցմանն ի պատասխան հայտնել էին ՀՀ գլխավոր դատախազությունից։
Նաեւ հիշեցրել էր, որ 2022թ․ դեկտեմբերի 14-ին Գևորգ Էմին-Տերյանը ֆեյսբուքյան գրառում էր կատարել՝ «Ի նշան բողոքի` պետք է հրապարակի տոնածառը վառել», որից հետո հրավիրվել էր ոստիկանություն հարցաքննության, ու նրան մեղադրանք էր առաջադրվել ՀՀ քրեական օրենսգրքի 329-րդ հոդվածի 2-րդ մասի 3-րդ կետով նախատեսված արարքի համար։ Նույն օրը նախաձեռնվել էր քրեական վարույթ և հանրային քրեական հետապնդում էր հարուցվել լրագրողի նկատմամբ։
Հասմիկ Բուդաղյանը նշել է, որ հունիսի 30-ին քրեական վարույթը կարճվել է։
Aravot.am-ի հետ զրույցում Գեւորգ Էմին-Տերյանն ասաց, որ բազմակի մուտքով վիզա ուներ, որն ավարտվում էր հունիսի 30-ին, եւ նույն օրը զուգադիպությամբ ավարտվել է գործը: «Շատ ծիծաղելի էր, որ 7 ամիս քննել են ու նոր են հասկացել, որ հանցակազմ չկա, կարող էին դատել կամ մի 10 տարի էլ քննեին, նոր հասկանային:
Կարդացեք նաև
Ընդ որում, քննիչը 2 անգամ ժամանակ է խնդրել, իբր մի անգամ ավարտել են, հետո նորից դատախազն ուղարկել է նախաքննության, ասես ձեռառնոցի լինի…»:
Գեւորգ Էմին-Տերյանն ասաց, որ կարճման որոշումն ինքը դեռ չի ստացել։ Բացի այդ իրեն վնաս է պատճառվել, որի փոխհատուցման համար դիմելու է դատարան:
Գոհար ՀԱԿՈԲՅԱՆ
