Հռոմի Ֆրանցիսկոս պապի բանագնաց, Սուրբ աթոռի պետքարտուղար, կարդինալ Պիետրո Պարոլին, որը Գյումրիի Սրբոց Նահատակաց հայ կաթողիկե աթոռանիստ եկեղեցում նախորդ օրը մասնակցեց Սուրբ և Անմահ պատարագին, պարզաբանեց, որ իր այցը հումանիտար է։
«Մեր գլխավոր ծառայությունը հումանիտար է, որովհետև մենք վստահ ենք՝ հումանիտար ժեստերը կարող են ծառայել ընդհանուր մթնոլորտ ստեղծելու, նաև փոքրիկ ժեստերը, որպեսզի հասնենք խաղաղության հաստատմանը։ Մեկնելով Սուրբ Աթոռից, որը որպես պետություն մարդասիրական բնույթ է կրում, եկել եմ, որպեսզի ջանք գործադրեմ, որ այսպիսի մարդասիրական ժեստերի միջոցով կարողանանք խաղաղության հաստատմանը հասնել։
Խոսել ենք և՛ Ադրբեջանում նախագահի հետ, և՛ Հայաստանում նախագահի և վարչապետի հետ, այն տեղեկությունները, որոնք հավաքել ենք, պիտի վերադառնանք ու տեսնենք՝ ինչպես հետևողականորեն իրականացնենք մեր քայլերը», -ասաց կարդինալ Պիետրո Պարոլին։
Անդրադառնալով Գյումրիում գերիների հարազատների հետ հանդիպմանը՝ նա նշեց, որ պատերազմը միշտ կործանարար է։
Կարդացեք նաև
«Սա առիթ էր մեր ձեռքով շոշափելու այն տառապանքը, որ կոնկրետ անձինք կրում են, պատերազմը միշտ կործանարար է։ Հանդիպել երիտասարդ մայրերին, որոնք կորցրել են իրենց երիտասարդ զավակներին, սիրտդ պատռվում է։ Բոլոր պատերազմների հետևանքները նույնն են, բայց այսպես մոտիկից ծանոթանալ․․․ Ինչպես իրենք խնդրեցին՝ աղոթել և առաջ տանել մեր ջանքերը, որպեսզի հասնենք խաղաղության հաստատմանը»,-ասաց Սուրբ Աթոռի պետքարտուղարը։
Լուսանկարը՝ Catholicherald.co.uk
Նունե ԱՐԵՎՇԱՏՅԱՆ
