«Մենք ենք մեր սարերը» տարածքային գործակալության համահիմնադիր, Արցախի Հանրապետության նախկին պետնախարար Ռուբեն Վարդանյանը ուղիղ եթերով դիմեց արցախցիներին եւ գաղափարակիցներին՝ անդրադառնալով Արցախում երեկ կայացած հանրահավաքին:
«Մենք ողջունում ենք Արցախում կայացած հանրահավաքը: Բոլորս միասին պետք է ցույց տանք մեր ուժը, միասնությունը, պայքարի ոգին, եւ այն, որ համաձայն չենք՝ Ադրբեջանը շարունակի իրականացնել իր էթնիկ զտման ծրագիրն Արցախի դեմ: Այս պարագայում շատ կարեւոր է, որ ազնիվ խոսենք»,-ասաց նա ու մի քանի կետ առանձնացրեց:
«Այս իրավիճակում, որ այժմ գտնվում ենք, Համազգային շարժման ղեկավարը մեզ մոտ պետք է լինի մեր նախագահը եւ զորահրամանատարը, այո, ինքը հրապարակում էր, բայց ինքը պետք է ուղիղ խոսի ժողովրդի հետ, որովհետեւ դա իր պարտականությունն է: Որպես առաջին դեմք, պարոն նախագահ, դուք պետք է նորից վերաստեղծեք ձեր կապը ժողովրդի հետ: Դա դժվար է, բայց շատ կարեւոր է, որովհետեւ ասում ենք, որ կազմակերպված է պետության կողմից, իսկ դուք պետության ղեկավարն եք, ուրեմն ուրիշ կերպ չի կարող լինել: Ես գիտեմ՝ դուք չեք սիրում խոսել հրապարակում պատերազմից հետո, բայց մենք եկել ենք այն իրավիճակին, որ ձեր ուղիղ կապը ժողովրդի հետ շատ կարեւոր է:
Երկրորդը՝ մենք ճիշտ պահանջներ ենք դրել եւ ռուս խաղաղապահների առաջ, եւ Կարմիր Խաչի, եւ միջազգային տարբեր կազմակերպությունների, բայց չենք խոսել ամենակարեւոր կողմի մասին, որը ամենամեղավորն է այս իրավիճակի : Դա Հայաստանի իշխանությունն է եւ Հայաստանի վարչապետը, որոնք ընդունել են Արցախը Ադրբեջանի կազմում եւ դրանով ստեղծել այս ամբողջ դժվարությունները, լուրջ խնդիրները՝ բոլորի համար: Ընդունել Արցախը Ադրբեջանի կազմում, միայն քաղաքական հայտարարություն չէ, այն բերելու է շատ ծանր եւ մեծ քանակի դժվարություններ:
Կարդացեք նաև
Երրորդը՝ մենք մեր հանրահավաքին հստակ չդիրքորոշեցինք, թե ինչ մանդատով, ինչ պահանջներով պետք է ՀՀ վարչապետն այսօր հանդիպման գնա Ալիեւի եւ Շառլ Միշելի հետ, ինչպիսին են մեր հարաբերությունները Հայաստանի կառավարության հետ, ՀՀ կառավարությունն ուղղակի փոխանցո՞ւմ է մեր դիրքորոշումը, իրե՞նք են որոշում, թե ինչ են ասելու, իրենք խորհո՞ւրդ են վերցնում մեզանից, թե հասկանալով իրենց պատասխանատվությունը , որ Արցախի անվտանգության երաշխավոր են, մեզ հետ աշխատում են որպես ընդհանուր խումբ եւ անում են ամեն ինչ, որ իրենց պարտականությունները կատարեն»,-ասաց Ռուբեն Վարդանյանը:
Մանրամասն՝ տեսանյութում:
Պատրաստեց Գոհար ՀԱԿՈԲՅԱՆԸ
