Փաստաբան Վահան Հովհաննիսյանը իր ֆեյսբուքյան էջում ուղիղ եթերով հայտարարել է, որ ծանուցմամբ 44-օրյա պատերազմում զոհված Մխիթար Գալեյանի հորը՝ Գարիկ Գալեյանին կանչել են Քննչական վարչություն, իրենք ներկայացել են ու պարզել հետեւյալը. «Գարիկ Գալեյանին մեղադրանք են առաջադրել 2022-ի հունիսի 30-ին Գլխավոր դատախազության շենքի դիմաց տեղի ունեցած միջադեպի գործով:
Այդ գործով շուրջ 1 տարուց ավելի որեւէ քննչական, դատավարական գործողություն չի իրականացվել, ծնողներից որեւէ մեկին չեն հարցաքննել: Դեպքից հետո մենք ինքներս ենք ներկայացել ոստիկանության բաժին, տվել ենք բացատրություն, դեպքի մասին հայտնել ենք: Մենք ունենք վնասվածքներ, այսինքն՝ Գարիկ եւ Արթուր Գալեյանն ու Վահիկ Սահակյանը, սակայն այդ գործով մեղադրանք է ներկայացվում Գարիկ Գալեյանին»,- ասաց պաշտպանը՝ հավելելով՝ թե ինչու են հիմա դա անում, այդ մասին կխոսի մի քանի օրից:
Հռիփսիմե ՋԵԲԵՋՅԱՆ
