Երևանի «Ոսկե ծիրան» 20-րդ կինոփառատոնի շրջանակում փառատոնի պատվավոր հյուրերը, մասնակիցները և կազմակերպիչները հյուրընկալվեցին Արմավիրի մարզի Առատաշեն համայնքում գործող «Aratashen winery» գիներանում: Օրը հատկապես նշանավորվեց նրանով, որ հենց Aratashen Winery գիներանում, կինոյում մեծ ավանդի համար Վարպետ մրցանակը հանձնվեց ռեժիսոր Մայքլ Գյուրջյանին:
Մրցանակը հանձնեց Արմավիրի մարզպետ Էդվարդ Հովհաննիսյանը, որը նաև հանդես եկավ ողջույնի խոսքով։
Կարդացեք նաև
Մրցանակակիրը տնկեց իր անվանական տնկին՝ փառատոնի նախորդ տարվա հյուրերի տնկիների կողքին։
«Ոսկե ծիրան» միջազգային կինոփառատոնի հիմնադիր նախագահ Հարություն Խաչատրյանն իր շնորհակալական խոսքում հիշատակեց նախորդ տարվա տնկման արարողությունը՝ ուրախությամբ հայտնելով, որ այն շարունակական բնույթ է կրում։
Անդրադառնալով «Ոսկե ծիրան» միջազգային կինոփառատոնի հետ համագործակցությանը՝ Aratashen Winery ներկայացուցիչը նշեց․ «Ուրախ ենք մեզ մոտ՝ Aratashen Winery գիներանում արդեն երկրորդ անգամ հյուրընկալելու «Ոսկե ծիրան» միջազգային կինոփառատոնի մասնակիցներին և հյուրերին․ սա կարծես վերածվում է մի գեղեցիկ ավանդույթի»։
Միջոցառման ընթացքում տեղի ունեցավ կինոգետ, արվեստի վաստակավոր գործիչ, փառատոնի երկարամյա մասնակից, բարեկամ Արմեն Մեդվեդևի գրքի շնորհանդեսը։
Երեկոյի վերջում ելույթ ունեցավ «Կարին» ազգագրական համույթը՝ Գագիկ Գինոսյանի գլխավորությամբ, ինչը, միանշանակ, երեկոյի ամենահիշարժան պահերից էր, քանի որ համույթի հետ հայկական ավանդական քոչարիի էին բռնվել նաև հյուրերը։
Մամուլի հաղորդագրություն
