«Զենքի շրջանառության կարգավորման մասին օրենքում բացարձակապես խոսք չկա զենքի ազատ վաճառքի մասին։ Խոսք է գնում զենքի շրջանառության ոլորտում կարգավորումների մասին, որոնք մեր քաղաքացիներին քննական կարգի միջոցով հնարավորություն կտան ունենալ ինքնապաշտպանական միջոցներ»,- Ազգային ժողովի արտահերթ նստաշրջանում «Զենքի շրջանառության կարգավորման մասին» օրենքում լրացումներ եւ փոփոխություններ կատարելու մասին եւ «Պետական տուրքի մասին» օրենքում լրացումներ եւ փոփոխություն կատարելու մասին օրենքների նախագծերի քննարկման ժամանակ իր ելույթում ասաց ՔՊ խմբակցության պատգամավոր Վիլեն Գաբրիելյանը։
Պատգամավորը հավելեց․ «Մեր քաղաքացիներն իրավունք ունեն ունենալ ինքնապաշտպանական միջոցներ, դա միանշանակ է, դա իրենց իրավունքն է, բայց շատ կարեւոր է այդ ինքնապաշտպանական միջոց ունեցողը կարողանա այդ ինքնապաշտպանական միջոցից օգտվել, օգտագործել, այդ թվում՝ նաեւ իր անվտանգության կանոնների մասով»։
Ազգային ժողովն առաջին ընթերցմամբ ընդունեց նախագիծը։
Ռոզա ՀՈՎՀԱՆՆԻՍՅԱՆ
