«Խոսքը անհարկի ավելի մեծ թվով հաստատություններ չունենալու եւ ավելի արդյունավետ մոտեցում ունենալու մասին է»,-այս մասին այսօր կառավարության նիստից հետո լրագրողների հետ ճեպազրույցում ասաց ԿԳՄՍ նախարար Ժաննա Անդրեասյանն՝ անդրադառնալով Երեւանի հայ-ամերիկյան «Էրեբունի» պետական բժշկական քոլեջի լուծարմանը, որի մասին որոշման նախագիծն այսօր գործադիրը հաստատեց։
Նախարարն ասաց, որ կառավարության ծրագրով ամրագրված է, որ քոլեջների եւ ուսումնարանների պարագայում նախարարությունը պետք է գնա մասնավորի հետ համագործակցության եւ համատեղ կառավարման մոդելին․ «Շարունակաբար ունենալու ենք օպտիմալացման գործընթաց, որովհետեւ ունենք 100 հաստատություն, այնինչ կարող ենք նայել եւ տեսնել, թե որտեղ ունենք ավելի լավ տարբերակ՝ հաստատությունների վերակազմակերպման։ Այս պարագայում ունեինք հարեւանությամբ գործող երկու բժշկական քոլեջներ, որոնցից մեկը՝ ոչ պետական, եւ ունենք համագործակցության հնարավորություն մասնավորի հետ։ Բոլոր ուսանողների կրթությունը ապահովված է լինելու եւ մենք շարունակելու ենք ֆինանսավորել այն կրթությունը, որի կարիքը կա»։
Նելլի ԲԱԲԱՅԱՆ
