Այսօր Արցախում բողոքի ցույց էր անում «Միջանցքի ապաշրջափակման ժողովրդական շարժման շտաբը»։ Նրանք պահանջում են ապաշրջափակել Բերձորի միջանցքը։ Մասնակիցները որոշեցին գնալ նախագահական նստավայր, կառավարություն, դիմել իշխանություններին՝ պարզելու՝ Արցախի իշխանությունները միանո՞ւմ են իրենց, թե՞ ոչ։
Ցուցարարների հետ հանդիպեց Արցախի պետնախարար Գուրգեն Ներսիսյանը։ «Եթե համաժողովրդական շարժումն է իրավիճակից դուրս գալու միակ ելքը, այդ ժամանակ արդեն բոլորս միասնաբար դուրս կգանք։ Համոզված եղեք, պետական իշխանությունը, պետական ծառայողները, գուցե ինչ-որ տեղ պաշտոնական լիազորություններով պայմանավորված՝ ավելի զուսպ են, բայց համաժողովրդական շարժման ժամանակ պետական ծառայող, ոչ ծառայող տարբերակում չի լինելու։ Մեկ անձի պես ամբողջ ժողովուրդը միասնաբար մասնակցելու է համաժողովրդական շարժմանը»։
Պետնախարարի ելույթից հետո «Միջանցքի ապաշրջափակման ժողովրդական շարժման շտաբի» անդամներից Դավիթ Վանյանն ասաց, որ պայքարի արդյունքում իրավիճակը բերել են նրան, որ բոլորը համաձայն են պայքարի դուրս գալ։ «Վաղը, մյուս օրը 10, 20, 50 հազար մարդ է դուրս գալու, սա ձեր բոլորի շնորհիվ է»,- շարժման մասնակիցներին դիմեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
