Գյումրու թիվ 1 գերեզմանոցը, որը վաղուց համարվում է կիսափակ, այսինքն՝ այստեղ նոր հողատարածքներ չեն հատկացվում, մնացել են ընտանեկան գերեզմանները, հուղարկավորությունները միայն այդտեղ են շարունակվում, Երևանում բնակվող Ա․Հ․-ն իր հարազատների գերեզմանոցում հանգուցյալի է հայտնաբերել։
Վերջինս մի քանի օր առաջ դիմել է Գյումրու ոստիկանության Կումայրի բաժին՝ տեղեկացնելով, որ 2022 թվականին Ս․Ա․-ն և Ն․ Ա․-ն առանց թույլտվության հարազատների գերեզմանոցում հուղարկավորել են Մ․ Ա․-ին։
Մեր տեղեկություններով, գործն ուղարկվել է քննչական վարչություն:
Հիշեցնենք, որ «Հավերժ հիշատակ» ՓԲԸ-ի տնօրեն Էդուարդ Բաղրամյանն Aravot.am-ին տեղեկացրել էր, որ հանցագործությունները՝ գողության դեպքերը, սրբապղծությունները կանխելու նպատակով Գյումրու երեք գերեզմանոցներում՝ թիվ 1, թիվ 2 և Շիրակ համայնքի հարևանությամբ գտնվող «Շիրակում» տեսախցիկներ են տեղադրելու։
Կարդացեք նաև
Պաշտոնյան նշել էր, որ Գյումրու գերեզմանատներում պահակների հաստիքներ չկան, քանի որ քաղաքի բյուջեն հնարավորություններ չունի։ Պահակներ պահելու համար ահռելի մեծ ծախսեր են պահանջվում, Էդուարդ Բաղրամյանի հաշվարկներով, առնվազն 8 պահակ է անհրաժեշտ, այսինքն՝ տարեկան առնվազն 8 միլիոն դրամ գումար։
Նունե ԱՐԵՎՇԱՏՅԱՆ
