ԱԺ արտահերթ նստաշրջանում քննարկվեց «Պատիվ ունեմ» խմբակցության պատգամավոր Թագուհի Թովմասյանի՝ որպես Մարդու իրավունքների պաշտպանության և հանրային հարցերի մշտական հանձնաժողովի նախագահի լիազորությունների դադարեցման մասին ԱԺ որոշման նախագիծը։ ԱԺ ընդդիմադիր պատգամավորները հարցը քննարկման ժամանակ լքեցին նիստերի դահլիճը։
Հիմնական զեկուցող՝ ՔՊ խմբակցության պատգամավոր Հովիկ Աղազարյանն ասաց, որ ՔՊ խմբակցությունն իր նիստում որոշում է կայացրել հանդես գալ այս նախաձեռնությամբ։ Նա ներկայացրեց հիմնավորումը, նշեց, որ Թագուհի Թովմասյանը 8-րդ գումարման ԱԺ գործունեության ընթացքում ԱԺ խորհրդի 46 նիստերից մասնակցել է ընդամենը 8-ին՝ այսպիսով չկատարելով հանձնաժողովի նախագահի իր պարտականությունները։ «Խորհրդի նիստերին չմասնակցելը հանգեցրել է այն բանին, որ հանձնաժողովն ԱԺ խորհրդի 46 նիստերից 38-ին չի ունեցել ներկայացուցիչ՝ այսպիսով զրկված լինելով ԱԺ լիագումար նիստերի օրակարգի ձեւավորումից եւ որոշումների կայացումից։ Սա վատթարացնող ազդեցություն է ունեցել հանձնաժողովի ընդհանուր գործունեության վրա»,- ասաց Աղազարյանը։ Նա նշեց նաեւ, որ Թագուհի Թովմասյանը, չկատարելով օրենքով սահմանված իր պարտականությունները, հետեւողականորեն չմասնակցելով ԱԺ խորհրդի նիստերին, խոչընդոտել է հանձնաժողովի լիարժեք եւ բնականոն գործունեությանը։
«Թագուհի Թովմասյանը տարբեր իրավիճակներում, այդ թվում՝ իր իսկ նախագահությամբ ընթացող հանձնաժողովի նիստերի ընթացքում ՀՀ հարյուր հազարավոր քաղաքացիների արժանապատվության վիրավորման եւ ատելության խոսքի նկատմամբ ցուցաբերել է անտարբեր վերաբերմունք՝ իր անգործությամբ նպաստելով դրանց կրկնությանը։ Տարբեր դրվագներում Թագուհի Թովմասյանը չի պաշտպանել ՀՀ Սահմանադրությամբ ամրագրված մարդու՝ որպես բարձրագույն արժեք անօտարելի արժանապատվությունն այն ոտնահարող, նվաստացնող եւ վիրավորանք պարունակող հայտարարություններից,- ասաց Աղազարյանը։ Ըստ նրա՝ Ազգային ժողովը նպատակ ունի հետագայում ընտրելու հանձնաժողովի նախագահի, որը կկատարի իր պարտականությունները հավուր պատշաճի, միաժամանակ կմասնակցի խորհրդի նիստերին։
Թագուհի Թովմասյանի լիազորությունների դադարեցման հարցը որոշվեց փակ գաղտնի քվեարկությամբ։62 կողմ, 1 դեմ հարաբերակցությամբ Թագուհի Թովմասյանը զրկվեց հանձնաժողովի նախագահի լիազորություններից
Կարդացեք նաև
Ռոզա ՀՈՎՀԱՆՆԻՍՅԱՆ
