Հայաստանի Եվրոպական կուսակցության համանախագահ Տիգրան Խզմալյանը պնդում է, որ այս տարի գարնանը Տեղ գյուղի, ինչպես նաեւ ավելի վաղ Սյունիքի եւ Ջերմուկի բախումները տեղի են ունեցել ՀՀ-ին պատժելու ռուս-ադրբեջանական համատեղ ծրագրով։
Նա Aravot.am-ին ասաց, որ ՀՀ սահմանների վերահսկումը դեռեւս 1995-ից առաջին նախագահ Լեւոն Տեր-Պետրոսյանի համաձայնությամբ հանձնված էր Ռուսաստանին. «Եթե արեւմտյան եւ հարավային սահմանը վերահսկվում է ՌԴ ՖՍԲ զորքերով, ապա 2020 թվականից հետո արեւելյան սահմանի առանձին հատվածները դարձան ՌԴ ՊՆ պատասխանատվության գոտի։ 2022-ի Ադրբեջանի սեպտեմբերյան հարձակումից եւ ՀՀ բանակի 200 ավելի զոհ տալուց հետո, արդեն նոյեմբերին ԵՄ-ն առաջարկեց 40 դիտորդ ուղարկել Սյունիք։ Փաշինյանի վկայությամբ, երկու հատվածում ռուսական զորքերը հրաժարվեցին դուրս գալ եւ տեղը զիջել ԵՄ դիտորդներին։ Մեկը հենց Տեղ գյուղի մոտ էր։ ՌԴ նախագահ Պուտինը չկատարեց Փաշինյանի խնդրանքը եւ չհեռացրեց իր զորախումբը այնտեղից՝ ասելով, թե իբր դա «խնդրահարույց տարածք է»։
Իրականում այնտեղ պատրաստվում էր նոր ճեղքումի փորձ, որի նպատակն էր՝ կտրել Սյունիքը ՀՀ-ից եւ հասնել Նախիջեւան՝ բացելով «Զանգեզուրի միջանցք»։ Այդ փորձը արվեց հենց Տեղ գյուղի մոտ, որտեղ ռուսները պայմանավորված պահին հետ քաշվեցին՝ ներս թողնելով ազերիներին։ Սակայն հայոց դիմադրությունը եւ Արեւմուտքի արագ արձագանքը խափանեցին այդ նախագիծը»:
Խզմալյանի խոսքով, պետք է արձանագրել, որ այնտեղ, որտեղ եվրոպացիներն են կանգնած, ազերիները չեն կարողացել առաջ գալ: «Այնտեղ, որտեղ կան ԵՄ դիտորդներ, ո՛չ զոհեր ունենք, ո՛չ էլ վիրավորներ: Միակ տեղը, որտեղ առաջ են եկել` Տեղն է»:
Կարդացեք նաև
Զրուցեցինք նաեւ Տեղ համայնքի ղեկավար Դավիթ Ղուլունցի հետ՝ հետաքրքրվելով, իսկապե՞ս ռուս-ադրբեջանական համատեղ ծրագրով են Տեղ համայնքում ադրբեջանցիներն առաջ եկել ու հաստատվել, ի պատասխան պարոն Ղուլունցն ասաց, որ չի ցանկանում մեկնաբանել. «Ես իմ մեջ իմանում եմ՝ ով է մեղավոր 101 տոկոսով, ով մեղավոր չէ, ում միջոցով են անում, ում ձեռքի գործն է, ես այդ փաստերին ներկա եմ եղել, բայց այդ փաստերը հանրայնացնելու իրավունք չունեմ: Պարոն Ղուլունցին գիտե՞ք՝ ինչ է պետք, մեր համայնքին, մեր ժողովրդին այս պահին պետք է, որ ադրբեջանցիները մեր հողերից հետ գնան, որ մեր գյուղացիները մեր հողերը մշակեն ու խաղաղություն լինի ու անվտանգությունն ապահովվի»:
Արփինե ՍԻՄՈՆՅԱՆ
