Վերաքննիչ հակակոռուպցիոն դատարանն այսօր դռնփակ ռեժիմով քննել է ՀՀ ԶՈՒ 3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովի խափանման միջոց կալանքի դեմ պաշտպանների բողոքը։ Դատարանը հեռացել է խորհրդակցական սենյակ, որոշումը կհրապարակի երկուշաբթի՝ ժամը 16։00-ին։ Խաչատուրովի փաստաբան Հակոբ Ենոքյանը «Առավոտին» տեղեկացրեց, որ Գրիգորի Խաչատուրովը ներկա չէր այսօրվա նիստին։
«Դատարանը անհրաժեշտ չէր համարել իր ներկայությունը, քանի որ փաստական հանգամանքներ չէր քննարկելու, ուղղակի իրավական հարցեր էր քննարկելու։ Օբյեկտիվ քննարկում էր»,- ասաց փաստաբանը։
Մայիսի 15-ին Հակակոռուպցիոն դատարանը դռնփակ նիստում որոշում էր կայացրել 3 ամսով երկարաձգել Գրիգորի Խաչատուրովի կալանքի ժամկետը։ Այս որոշման դեմ Խաչատուրովի փաստաբանները վերաքննիչ բողոք էին ներկայացրել։ Ավելի վաղ Վերաքննիչ հակակոռուպցիոն դատարանը տեղեկացրել էր, որ գրավոր ընթացակարգով է քննվելու բողոքը, եւ հունիսի 22-ին դատարանը պետք է գրավոր ընթացակարգով հրապարակեր որոշումը։ Սակայն դատարանը որոշել էր անցել բանավոր ընթացակարգի։
Հիշեցնենք, որ Գրիգորի Խաչատուրովը մեղադրվում է փողերի լվացման մեջ: Ըստ մեղադրանքի՝ Խաչատուրովը, 2006-ից 2010 թվականներին զբաղեցնելով զորամասի հրամանատարի պաշտոնը, հանցավոր ճանապարհով ձեռք է բերել անշարժ գույք, ապա օրինականացրել այն։
Կարդացեք նաև
Ռոզա ՀՈՎՀԱՆՆԻՍՅԱՆ
