Մենք` Արցախի բռնազավթված շրջաններից, ինչպես նաև` Ադրբեջանական ԽՍՀ տարածքից տեղահանված բնակիչների իրավունքների պաշտպանությամբ զբաղվող հասարակական կազմակերպությունների ներկայացուցիչներս, խստագույնս դատապարտում ենք Հայաստանի Հանրապետությունում ԱՄՆ-ի դեսպան Քրիսթինա Քվինի վերջերս արած հայտարարություններն Արցախի բնակչության և ՀՀ սահմանային իրավիճակի վերաբերյալ:
Դեսպանի այն արտահայտությունը, որ ԱՄՆ-Ն հավատացած է, թե Արցախի հայերը կարող են անվտանգ և խաղաղ ապրել Ադրբեջանի կազմում, ծայրահեղ մտահոգիչ է և անընդունելի: Այդ արտահայտությունը կասկածի տակ է դնում ԱՄՆ-ի իշխանությունների անկեղծությունը` Արցախի ժողովրդի իրավունքների և անվտանգության հարցերով մտահոգվածության առումով:
Ադրբեջանը ժառանգական բռնապետություն է` արմատացած հայատյացությամբ: Ադրբեջանը բարձրագույն, այդ թվում` երկրի ղեկավարի մակարդակով հայերի նկատմամբ օգտագործում է վիրավորական և ապամարդկայնացնող բառապաշար, կիրառում է բռնության և սպանությունների քաղաքականություն ազգությամբ հայ մարդկանց նկատմամբ, ստեղծում է հակամարդկային պայմաններ Արցախում ապրողների համար: Արդեն երկու հարյուր օրից ավելի է արգելափակված է Արցախն արտաքին աշխարհին կապող միակ ճանապարհը: Արդեն մոտ մեկ ամիս է, ինչ Ադրբեջանը լիովին արգելում է պարենի, բուժամիջոցների և վառելիքի որևէ ներմուծումն Արցախ: Ադրբեջանը պարբերաբար արգելում է նաև Կարմիր խաչի մեքենաների ելումուտն Արցախ, իսկ դրանց տեղաշարժը թույլատրելու դեպքում էլ` խուզարկում է դրանք: Դա միջազգային իրավունքի կոպտագույն և աղաղակող խախտում է: Նման վարվելակերպ այս պահին դրսևորում են Թալիբանը և ԻՇԻՊ-ը. կազմակերպություններ, որոնք հենց նույն ԱՄՆ-ը համարում է ահաբեկչական:
Եւ առավել տարակուսական է, որ տիկին դեսպանն այդ արտահայտությունն անում է իր երկրի Անկախության օրվան նախորդող օրը: ԱՄՆ-ի անկախացումն ազատության և հակակայսերականության նշանակալի դրսևորում էր: Արդյոք տիկին դեսպանը համարո՞ւմ է, թե Նոր Անգլիայի վերաբնակիչները կարող էին անվտանգ և խաղաղ ապրել Բրիտանական կայսրության կազմում: Արդյոք տիկին դեսպանը հավատացա՞ծ է, թե Կոսովոյի ալբանացիները կարող են անվտանգ և խաղաղ ապրել Սերբիայի կազմում:
Մենք` Արցախի բռնազավթված տարածքներից և Ադրբեջանական ԽՍՀ տարածքից տեղահանված բնակիչների իրավունքների պաշտպանությամբ զբաղվող հասարակական կազմակերպությունների ներքո ստորագրյալ ներկայացուցիչներս վճռականորեն դեմ ենք արտահայտվում ցանկացած արտահայտության կամ գործողության, որն ուղղված է Արցախի բնակչության իրավունքների և ազատության դեմ:
Մենք թախանձաբար պնդում ենք, որպեսզի Հայաստանի Հանրապետությունում ԱՄՆ-ի դեսպանությունը պաշտոնական պարզաբանմամբ հանդես գա դեսպանի այդ արտահայտությունների վերաբերյալ:
«Վերադարձ դեպի Քարվաճառ» ՀԿ
«Հանուն Հադրութի» ՀԿ
«Կռունկ» արցախահայերի իրավունքների պաշտպանության ՀԿ
«Վերադարձ դեպի Քաշաթաղ» ՀԿ
«Հադրութի դեօկուպացիա» ՀԿ
Ադրբեջանական ԽՍՀ-ից փախստականների համագումար
«Հարմոնիա» Շուշիի կանանց ՀԿ
«Քարավան-88» ՀԿ
Ադրբեջանական ԽՍՀ հայերի միավորում ՀԿ
«Ահազանգ» հայ փախստականների ՀԿ
«Վերադարձ դեպի Դիզակ» ՀԿ
