Կանադայի Վանկուվեր քաղաքում տեղի է ունեցել Եվրոպայի անվտանգության եւ համագործակցության կազմակերպության խորհրդարանական վեհաժողովի տարեկան 30-րդ նստաշրջանը, որի աշխատանքներին մասնակցել է վեհաժողովում ՀՀ Ազգային ժողովի պատվիրակությունը: ԵԱՀԿ ԽՎ քաղաքականության եւ անվտանգության հարցերի հանձնաժողովի նիստում ելույթ է ունեցել Ազգային ժողովի պատվիրակության անդամ Լիլիթ Մինասյանը:
«Հարգելի՛ գործընկերներ, այսօր ուզում եմ խոսել տարածաշրջանային անվտանգության ամրապնդման գործում ԵԱՀԿ ԽՎ դերի մասին: Կարծում եմ՝ այս կազմակերպությունը մեծ միջազգային հանրության մի մասն է եւ պետք է ուշադիր լինի մյուսների դիրքորոշումների նկատմամբ:
Հուսով եմ, գիտեք, որ Արդարադատության միջազգային դատարանն օրինականորեն պարտավորեցնող ժամանակավոր միջոց է ընդունել Ադրբեջանի դեմ եւ կարգադրել ձեռնարկել բոլոր անհրաժեշտ միջոցները` Լաչինի միջանցքով երկու ուղղություններով մարդկանց, տրանսպորտային միջոցների եւ բեռների անարգել տեղաշարժն ապահովելու համար:
Եվրախորհրդի խորհրդարանական վեհաժողովը վերջերս ընդունել է «Լաչինի միջանցքով ազատ եւ անվտանգ մուտքի ապահովման մասին» բանաձեւն ու հանձնարարականը: Վեհաժողովը չափազանց անհանգստացած է Լաչինի միջանցքով ազատ եւ անվտանգ անցման ընդհատմամբ եւ դրան հաջորդած տարածաշրջան էլեկտրաէներգիայի եւ գազի մատակարարումների կանխամտածված դադարեցմամբ:
Կարդացեք նաև
ԵԽԽՎ-ն շտապ կոչ է արել լուծել Լեռնային Ղարաբաղի հայ բնակչության իրավունքների եւ անվտանգության խնդիրները՝ Բաքվի եւ Ստեփանակերտի միջեւ երկխոսության եւ միջազգային չեզոք ներգրավման միջոցով խաղաղության իրականացման ցանկացած մեխանիզմում:
Վեհաժողովը կոչ է արել Ադրբեջանին հրավիրել Եվրոպայի խորհրդի պատվիրակությանն այցելել Լաչինի միջանցք եւ Լեռնային Ղարաբաղ՝ փաստահավաք առաքելության նպատակով տեղում իրավիճակը գնահատելու համար:
Եվրախորհրդարանի դիրքորոշումը, Եվրախորհրդարանի կողմից ընդունված ամենավերջին բանաձեւերը դատապարտում են Լեռնային Ղարաբաղի շրջափակման մարդասիրական հետեւանքները, դատապարտում ռուս խաղաղապահների անգործությունը եւ խնդրում նրանց փոխարինել ԵԱՀԿ խաղաղապահներով՝ ՄԱԿ-ի մանդատի ներքո. ԱՄՆ Պետդեպարտամենտի քարտուղար Բլինկենը խոր մտահոգություն է հայտնել Լեռնային Ղարաբաղում հումանիտար իրավիճակի վատթարացման կապակցությամբ, որը պայմանավորված է Լաչինի միջանցքի արգելափակմամբ:
Եվրոպական խորհրդի նախագահ Շառլ Միշելը, Ֆրանսիայի նախագահ Էմմանուել Մակրոնը, Գերմանիայի կանցլեր Օլաֆ Շոլցը, բոլոր այս եվրոպացի առաջնորդները նշել են, որ Լեռնային Ղարաբաղի ժողովրդի իրավունքները եւ անվտանգությունը պետք է հասցեագրվեն:
Իհարկե, մեր ադրբեջանցի գործընկերները կփորձեն հերքել այս բոլոր հայտարարությունները:
Բայց դա նշանակում է, որ Ադրբեջանը հերքում է միջազգային հանրության դիրքորոշումները:
Հույս ունեմ, որ ԵԱՀԿ խորհրդարանական վեհաժողովը նույնպես կոնկրետ հայտարարություններով կանդրադառնա այս բոլոր հարցերին:
Շնորհակալություն»,- ասել է Լիլիթ Մինասյանը:
ՀՀ Ազգային ժողով
