«Այսօր «ՀայաՔվեի» խորհրդանշական մեկնարկին մասնակցում էր ՍԴ աշխատակազմի նախկին ղեկավար Էդգար Ղազարյանը:
Նա լրագրողների հետ զրույցում նշեց, որ ստորագրությունները կհավաքվեն շատ ավելի շուտ, քան նախատեսված է՝ հաշվի առնելով այսօրվա ակտիվությունը: Երեւանի քաղաքապետարանը սկզբում խոչընդոտում էր, հետո բավարարեց նախաձեռնողների դիմումը եւ տրամադրեց տարածք:
Հարցին՝ դա չիմացության խնդիր էր, թե՞ միտումնավոր էին անում՝ Էդգար Ղազարյանը պատասխանեց. «Անկեղծ ասած, ինչքան ես Երեւանի քաղաքապետարանի հետ առնչվել եմ, այստեղ իրավական գիտելիքների մասով համակարգում լուրջ պրոբլեմ գոյություն ունի: Մեկի հետ ես հիմա եմ ընկել պրոբլեմի մեջ, որովհետեւ հուլիսի 5-ի հանրահավաքի համար տվել ենք ծանուցում, մերժել են, վիճարկել ենք ու ստիպված դիմել ենք դատարան: Սա ակնհայտ քաղաքական խնդիր է: Իրենք փորձել են քաղաքական որոշում կայացնել ու չթույլատրել, հետո, տպավորություն է, որ միջազգային կազմակերպությունները որոշակի անհանգստություն են ներքին կարգով փոխանցել, որովհետեւ առաջին անգամ է, որ քաղաքացիները նախաձեռնություն են ցուցաբերում օրենսդրական փոփոխություն իրականացնել եւ եթե դա պետք է արգելվեր միայն վարչական ճանապարհով, շատ մեծ խնդիրներ կառաջացներ իրենց համար»:
Կարդացեք նաև
Հարցին՝ եթե ստորագրավաքին 50 հազար մարդ ստորագրի, հարցը մտնելու է ԱԺ, որտեղ ՔՊ-ն մեծամասնություն է, կողմ կքվեարկե՞ն՝ Էդգար Ղազարյանը պատասխանեց. «Եթե իրենք 50 հազար մարդու արտահայտած կարծիքին 50 հոգով դեմ լինեն, պիտի երկար մտածել դրա համար»:
Հռիփսիմե ՋԵԲԵՋՅԱՆ
