«Մենք պետք է հասկանանք, որ Վաշինգտոնում Միացյալ Նահանգները անկյունաքարային հարց է դարձրել Արցախի հայերի իրավունքների պաշտպանությունը։ Ըստ երևույթին՝ այնտեղ բանակցությունների ընթացքում ականջահաճո որևէ բան չլսելու հանգամանքով պայմանավորված՝ Ադրբեջանը փորձում է այսպիսի անուղղակի մեթոդներով բոյկոտել բանակցային գործընթացը»,- «Ա1+»-ի հետ զրույցում նշեց քաղաքագետ Գուրգեն Սիմոնյանը։
Նրա խոսքով՝ դժվար թե Ադրբեջանը Միացյալ Նահանգների վերահսկողության տակ իրականացվող բանակցային գործընթացից ուղղակի դուրս գար, քանի որ դա կբերեր հակաքայլերի հենց Վաշինգտոնի կողմից։ Հավելեց՝ չպետք է մոռանանք, որ կառուցողական դիրքորոշումներ արտահայտելու շնորհիվ է Ադրբեջանը հենց այդ հարթակներում խորամանկում՝ համապատասխան վերաբերմունքի չարժանանալու համար։
Ըստ քաղաքագետի՝ Հայաստանի Հանրապետությունը այս առումով պետք է աշխատանք տանի, հստակ ցույց տա գործընկերների ներկայությամբ, որ Ադրբեջանը ապակառուցողական տրամադրված կողմ է և ամեն ինչ փորձում է անել, որպեսզի վերսկսի ռազմական գործողությունները։
Իսկ Արցախի ԱԺ-ում արված հայտարարությունը, որ հայկական կողմը անհապաղ պետք է դադարեցնի մեկնարկած բանակցությունները, քաղաքագետը մեկնաբանեց այսպես, որ կարող ենք ենթատեքստում ճնշումներ նկատել հենց Արցախի Հանրապետության վրա, որովհետև Արցախը գտնվում է պատանդի կարգավիճակում ռուս-ադրբեջանական դաշինքի ձեռքին։
Կարդացեք նաև
Չբացառեց նաև այն, որ Ռուսաստանի Դաշնությունն է ճնշում գործադրել Արցախի ռազմաքաղաքական ղեկավարության նկատմամբ։ Ավելացրեց, որ Միացյալ Նահանգները լավ հասկանում է ԼՂ-ի այդ պոռթկումները երբեմն որտեղի՞ց են լինում և ո՞ւմ հրահրմամբ են լինում։ Քաղաքագետը խոսքը եզրափակեց նրանով, որ Ռուսաստանի ջանքերը այստեղ որևէ տեղ չտանող հանգամանք են, և որևէ մեկը ականջալուր չի լինելու Լեռնային Ղարաբաղի այդ հորդորին՝ շատ լավ հասկանալով, որ դա կարող է ճնշում լինել, ինչը հենց այդպես էլ կա։
