Այսօր` Տավուշի մարզի Սարիգյուղ բնակավայրում հողին հանձնեցին Հայրենական մեծ պատերազմի մասնակից Բոլշևիկ Դավթյանի աճյունը: Վերջինիս համարվում էր անհայտ կորած մինչ 2020թ.-ը: Սարիգյուղ բնակավայրի վարչական ղեկավար Սեյրան Սարիբեկյանն Aravot.am-ի հետ զրույցում նշեց, որ նրա գերեզմանը հայտնաբերվել է Ուկրաինայում անհայտ կորածների հարցերով զբաղվող կազմակերպության կողմից:
«Բոլշևիկ Դավթյանի գերեզմանը 2020թ.-ին հայտնաբերվել է Ուկրաինայի Ժիտոմիրի շրջանում: Գերեզմանում եղել է սրվակ, որտեղ գրված են եղել նրա անձնական տվյալները: Համավարակով և այլ խնդիրներով պայմանավորված` աճյունի տեղափոխումը ձգձգվել է: Ուկրաինայում Հայաստանի դեսպանության և Ուկրաինայի հայերի միության ջանքերով աճյունն այսօր ամփոփվեց հայրենի հողում: Նշեմ, որ ՀՄՊ-ին Սարիգյուղից մասնակցել է 205 մարդ, որից 104-ը համարվում են անհայտ կորած: Բոլշևիկ Դավթյանը պատերազմ էր մեկնել եղբոր հետ, նա նույնպես համարվում է անհայտ կորած»,-նշեց Սարիբեկյանը:
ՀՄՊ-ում անհայտ կորածների հայտնաբերման և աճյունների տեղափոխման աշխատանքներին աջակցելու համար` Իջևան համայնքի ղեկավար Արթուր Ճաղարյանը շնորհակալագիր հանձնեց Ուկրաինային հայերի միության փոխնախագահ` Դավիթ Մկրտչյանին:
Կարդացեք նաև
Համայնքապետի կողմից շնորհակալագրեր կփոխանցվեն նաև Ուկրաինայում ՀՀ դեսպանին, «ՈՒՀՄ»-ի փոխնախագահներին:
Լիա ՃԱՂԱՐՅԱՆ
