ՀՀ ԱԺ «Հայաստան» խմբակցության դաշնակցական պատգամավոր Արմենուհի Կյուրեղյանը որպես ՀՅԴ ԳՄ նախաձեռնած ՌԴ-ի, ԱՄՆ-ի, Ֆրանսիայի դեսպանատների եւ ԵՄ հայաստանյան գրասենյակի առջեւ իրականացվող շուրջօրյա նստացույցի գլխավոր նպատակ նշեց մեկ անգամ եւս եւ հատկապես Մինսկի խմբի համանախագահ այս երկրների ղեկավարների մեծ ուշադրությունը հրավիրել Արցախում տիրող իրավիճակի վրա։
«Այսօր Արցախում իրականացվողը այլ կերպ, քան ցեղասպանական գործողություն, հնարավոր չէ գնահատել։ Ու դեռ ավելին, մի կողմից էլ Ալիեւը հայտարարում է, թե Մինսկի խմբի համանախագահների գործառույթներն այլեւս կարելի է համարել ավարտված, ասես, ինքն է այդ լիազորությունները այդ համանախագահների խմբին տվել ու հիմա էլ արդեն պատրաստվում է աշխատանքից ազատել։
Մենք կոչ ենք անում այս երկրների իշխանություններին՝ նախ, արձագանքել Ալիեւի այդ տխրահռչակ հայտարարություններին եւ երբեւէ ցած չդնել իրենց լիազորությունները, չմոռանալ իրենց լիազորությունների մասին, որ կոչված են Արցախի Հանրապետության կարգավիճակի հարցը լուծելու եւ առաջին հերթին հենց ՄԱԿ-ի փաստաթղթերով ամրագրված ազգերի ինքնորոշման իրավունքի սկզբունքի վրա եւ ոչ թե տարածքային ամբողջականության սկզբունքի վրա։
Բացի դա, մենք այս միջոցառմամբ մեկ անգամ եւս նաեւ մեր հանրությանն ենք կոչ անում հասկանալու, որ այսօր Արցախը այս իրավիճակում է առաջին հերթին մեր երկրի իշխանությունների գործունեության արդյունքում։ Մի կողմից պահանջում ենք, որ Մինսկի խմբի համանախագահները տեր կանգնեն իրենց լիազորություններին, մյուս կողմից այսօրվա մեր իշխանությունները շարունակում են Ադրբեջանի ցեղասպանական գործունեության որակը եւ նույն ձեւաչափերով իրենք են հայտարարություններ անում եւ ընդունում Արցախը Ադրբեջանի կազմում է։ Եվ մենք կոչ ենք անում առաջին հերթին մեր հանրությանը՝ տեր կանգնել մեր Արցախին, պայքարել արցախահայությանը այդ վիճակից հանելու համար»,-ասաց ընդդիմադիր քաղաքական գործիչը։
Կարդացեք նաև
Իսկ ԱԺ «Հայաստան» խմբակցության դաշնակցական պատգամավոր Գառնիկ Դանիելյանը հավելեց, որ ակցիան գործիքակազմերից մեկն է, որն այս պահին նպատակահարմար են գտել օգտագործելու։ «Կարծում ենք, այս ակցիան իր հասցեատիրոջը կգտնի։ Եվ այն ծանր վիճակը, որում այսօր գտնվում է Արցախը նաեւ տարբեր հարթակներից մեր ձայնը բարձրացնելով, կփորձենք օգտակար լինել Արցախում գտնվող մեր քույրերին ու եղբայրներին:
Աշոտ ՀԱԿՈԲՅԱՆ
