2020 թվականի 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստից հետո հանձնաժողովի նախագահ Անդրանիկ Քոչարյանը պատասխանեց լրագրողների հարցերին։ Նա անդրադարձավ Մովսես Հակոբյանի վերաբերյալ վարչապետ Նիկոլ Փաշինյանի հայտարարությանը։ Նախկին ռազմական գլխավոր տեսուչ Մովսես Հակոբյանը պատասխանել է Նիկոլ Փաշինյանին, անհիմն համարելով նրա հայտարարությունը։
«Պարոն Հակոբյանը ամպագորգոռ հայտարարություններ անելու փոխարեն, այս էլ որերորդ անգամ քննիչ հանձնաժողովը հրապարակային հրավիրում է, թող գա ու պարզապես ներկայացնի այն ամբողջ տեղեկատվությունը, ինչին ինքը տիրապետում է։ Հիմա ուշադիր հետեւել է, արձագանքել է այն հատվածներին, որը վարչապետը հրապարակայնացրեց, բայց չէ՞ որ այդ դրվագների հետ կապված ինքն ասելիք ունի։ Եվ քննիչ հանձնաժողովը շատ կցանկանար իրեն լսել։ Մենք բոլոր հրավերներն ուղարկել ենք այն պաշտոնյաները, որոնք ասելիք ունեն, դա եւ Վարդան Օսկանյանն է, եւ Տիրան Խաչատրյանն է, եւ Մովսես Հակոբյանն է, էլի կլինեն պաշտոնյաներ, որոնք անպայման հրավիրվելու են։ Կարծում եմ՝ քննիչ հանձնաժողով չգալը չի բխում ոչ մեր երկրի շահերից, ոչ էլ տվյալ պաշտոնյաների պաշտոնավարման ընթացքում տեղեկությունը հանձնաժողովին չներկայացնելու շահերից»,- ասաց Քոչարյանը։
Ռոզա ՀՈՎՀԱՆՆԻՍՅԱՆ
