Բանակցային գործընթացում կար այդպիսի ենթադրություն, որ Լեռնային Ղարաբաղի հիմնախնդրի կարգավորման սկզբունքների ստորագրումից հետո տեղակայվող խաղաղապահները չպետք է լինեն ԵԱՀԿ Մինսկի խմբի համանախագահությունը ներկայացնող որեւէ երկրից։ Այս մասին 2020 թվականի 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստում ասաց վարչապետ Նիկոլ Փաշինյանը։
Նա նշեց, որ հստակ ամրագրված նման դրույթ չի եղել, բայց այդ համատեքստը միշտ եղել է բանակցային գործընթացում։ «Եվ եթե կհիշեք, նաեւ 44-օրյա պատերազմի ընթացքում խոսվում էր շվեդ խաղաղապահների մասին, որը գործնական առումով էլ ինքը պրոբլեմատիկ է, որովհետեւ շվեդ խաղաղապահը տեղի ժողովրդի հետ ո՞նց էր շփվելու, ի՞նչ լեզվով։ Ռուսական առաջարկների մեջ, որը պայմանականորեն անվանվում է «լավրովյան պլան» էլի դա որեւէ տեղ գրված չէ, բայց բանակցություններն ու քննարկումներն այն տրամաբանությամբ են եղել, որ պետք է լինեն ռուս խաղաղապահներ։ Ես դրա համար եմ ասում, որ մոտավորապես նույն ճարտարապետությունը պետք է լիներ, ինչ նոյեմբերի 9-ի եռակողմ հայտարարության դեպքում, ինչը չի նշանակում, որ եթե պրոցեսները գնային հասնեին ՄԱԿ-ի անվտանգության խորհուրդ, ՄԱԿ-ի անվտանգության խորհուրդը տեսականորեն չէր կարող մեկ էլ որոշել, որ այս երկրի կամ երկրների խումբն է խաղաղապահներ գործուղելու։ Բայց այդպիսի ենթադրություն կամ մթնոլորտ եղել է, որ երեւի պետք է Մինսկի խմբի համանախագահ երկրներից չլինեն»,- ասաց Փաշինյանը։
Ռոզա ՀՈՎՀԱՆՆԻՍՅԱՆ
Լուսանկարը՝ Դավիթ ՂԱՀՐԱՄԱՆՅԱՆԻ
