Հակակոռուպցիոն դատարանում այսօր պետք է կայանար ԱԱԾ ՊՊԾ պետի նախկին տեղակալ Վաչագան Ղազարյանի, նրա հետ փոխկապակցված անձանցից ենթադրյալ ապօրինի ձեռք բերված գույքը եւ եկամուտները հօգուտ Հայաստանի Հանրապետության գանձելու մասին դատական նիստը։ Պաշտպանական թիմը միջնորդություն էր ներկայացրել, որպեսզի դատավորը հայցային վաղեմություն կիրառի գլխավոր դատախազության պահանջների նկատմամբ։ Դատարանը հեռացել էր խորհրդատվական սենյակ՝, որոշում կայացնելու։ Որոշումը պետք է հրապարակվեր հունիսի 26-ին, ժամը 14։00-ին։
Սակայն ի նշան փաստաբանների նկատմամբ պետական մարմիններում իրականացվող բռնությունների դեմ բողոքի, այսօր Խոշտանգումների զոհերի աջակցության միջազգային այս խորհրդանշական օրը փաստաբանական համայնքը մեկօրյա գործադուլ է հայտարարել ու Վաչագան Ղազարյանի եւ նրա հետ փոխկապակցված Արեւ Ղազարյանի, Ռուզաննա Բեգլարյանի, Մհեր Ղազարյանի, Արամ Դանիելյանի շահերի ներկայացուցիչները չէին ներկայացել դատական նիստին։
Նիստի քարտուղարը դատարանին տեղեկացրեց, որ պատասխանող Վաչագան Ղազարյանի ներկայությունը եւս չի ապահովվել։ Նիստը նախագահող դատավոր Կարապետ Բալայանը նշեց, որ դատարանը դիմել է ՔԿՀ-ին՝ Վաչագան Ղազարյանի ներկայությունն ապահովելու համար, սակայն ՔԿՀ-ից առայսօր որեւէ արձագանք, տեղեկություն չկա։ Ուստի նման պայմաններում, ինչպես նաեւ հայցվորի ներկայացուցչի կարծիքը հաշվի առնելով՝ դատարանը գտավ, որ գործի քննությունը ենթակա է հետաձգման եւ որոշեց նշանակել եւս մեկ նախնական դատական նիստ, որը կկայանա հուլիսի 19-ին, ժամը 10։00-ին։
Աշոտ ՀԱԿՈԲՅԱՆ
