Այսօր ԵԽԽՎ-ում ՀՀ ԱԺ պատվիրակության անդամները մամուլի ասուիս էին հրավիրել:
Aravot.am-ը հարցրեց՝ վարչապետ Նիկոլ Փաշինյանը մի քանի անգամ հայտարարել է, որ մենք ճանաչում ենք Ադրբեջանի տարածքային ամբողջականությունը 86.600 քկմ տարածքով, որի մեջ մտնում է նաեւ Արցախը, բայց Ալիեւի կողմից չենք լսել որեւէ հայտարարություն, որ ասի՝ ես էլ ճանաչում եմ Հայաստանի տարածքային ամբողջականությունը 29.800 քկմ տարածքով, այստեղ դուք խնդրահարույց բան չե՞ք տեսնում, որ մենք շտապել ենք այդ հայտարարությունն անելով ու ինչքանո՞վ կարող ենք հենվել զուտ Շառլ Միշելի հայտարարությունների վրա:
Պատվիրակության ղեկավար, ԱԺ փոխխոսնակ Ռուբեն Ռուբինյանը պատասխանեց. «Ամեն դեպքում բրյուսելյան վերջին հանդիպումից հետո Շառլ Միշելը հայտարարեց երկու երկրների կողմից միմյանց տարածքային ամբողջականությունը ճանաչելու մասին եւ ադրբեջանական կողմից դրանից հետո հերքում համենայնդեպս չի եղել: Բայց, այո, դուք ճիշտ եք, Ադրբեջանի ներկայացուցիչները մինչ օրս իրենք չեն հայտարարել դրա մասին եւ դա միանշանակ խնդիր է: Մենք միջազգային գործընկերների հետ քննարկում ենք սա: Բայց արդյոք շտապե՞լ ենք, թե՞ չենք շտապել, պետք է հասկանալ մի պարզ իրողություն՝ ՀՀ-ին պետք է, որ մեր սահմանները լինեն չվիճարկվող եւ չվիճարկված: Որովհետեւ, եթե կան սահմաններ, որոնք վիճարկված են, դրանք կարելի է տարբեր պատրվակներով խախտել: Ադրբեջանը իր բոլոր ռազմական սադրանքների մեծ մասը փորձում է հիմնավորել դելիմիտացիայի բացակայությամբ, կամ այլ աբսուրդային մտքերով: Հետեւաբար, ՀՀ շահերից է բխում ունենալ չվիճարկվող սահմաններ: Ընդ որում, այդ սահմանները ունենք, դա փաստ է: Դելիմիտացիա չունենալը չի նշանակում չունենալ սահմաններ: Բոլորը գիտեն` որոնք են ՀՀ սահմանները: Եվ մենք աշխատում ենք այն ուղղությամբ, որ Ադրբեջանը նույնպես դրանք բաց հայտարարի եւ ֆիքսի»:
Կարդացեք նաև
Հռիփսիմե ՋԵԲԵՋՅԱՆ
