ԱԺ արտահերթ նստաշրջանում վեճ տեղի ունեցավ «Հայաստան» ու ՔՊ խմբակցությունների պատգամավորների միջեւ։ Անդրադառնալով հարցին, որ ընդդիմադիր պատգամավորները չէին մասնակցել ՔՊ խմբակցության պատգամավոր Վիգեն Խաչատրյանի հոգեհանգստին, ԱԺ նախագահ Ալեն Սիմոնյանն ասաց․ «Ինչ վերաբերում է ձեր գործող գործընկերոջ հոգեհանգստին չմասնակցելուն, ձեր խղճի վրա եմ թողնում»։
«Հայաստան» խմբակցության ղեկավար Սեյրան Օհանյանը «դու»-ով դիմեց Ալեն Սիմոնյանին։ ««Դու»-ն դու ես, չհամարձակվես «դու»-ով դիմել ԱԺ նախագահին»,- ասաց Ալեն Սիմոնյանը։ Սեյրան Օհանյանն ի պատասխան ասաց․ «Ազգային ժողովի նախագահ չես»։ «Բա դու ո՞վ ես, որ ես ԱԺ նախագահը չեմ, դու ի՞նչ ես անում ըստեղ, գնա տուն սարքիր քեզ տարբեր տեղերում»,- Սեյրան Օհանյանին դիմեց Ալեն Սիմոնյանը։
Հայկ Կոնջորյանը Սեյրան Օհանյանին կոչ արեց կոռեկտ պահել իրեն։
«Պարոն Օհանյան, դուք դաստիարակություն ստացե՞լ եք, չգիտե՞ք, որ չի կարելի «դու»-ով խոսել։ Սուս, լռիր, պարոն Մինասյան, հանգիստ, առանց հավելյալ տվայտանքների»,- ասաց Կոնջորյանը։
Կարդացեք նաև
Այնուհետեւ դիմելով Սեյրան Օհանյանին՝ Հայկ Կոնջորյանն ասաց․ «Դահլիճի մեծամասնությունը չլսեց, թե դուք ինչ ասացիք ԱԺ նախագահին, հիմա ես ասում եմ՝ սրիկան դուք եք, որովհետեւ դուք ԱԺ նախագահին ասացիք՝ սրիկա»։
Սեյրան Օհանյանը Հայկ Կոնջորյանին «սրիկա» անվանեց։ «Ձայնդ, պապանձվիր, դու պապանձվիր»,- ասաց Հայկ Կոնջորյանը։
ԱԺ փոխնախագահ Ռուբեն Ռուբինյանն ընդմիջում հայտարարեց։
Ռոզա ՀՈՎՀԱՆՆԻՍՅԱՆ
