Ազգային ժողովը կառավարության նախաձեռնությամբ գումարել է արտահերթ նստաշրջան։ ԱԺ ընդդիմադիր «Հայաստան» եւ «Պատիվ ունեմ» խմբակցությունները չմասնակցեցին նստաշրջանի բացմանը։ Պատգամավորները նիստի սկզբում մեկ րոպե լռությամբ հարգեցին «Քաղաքացիական պայմանագիր» խմբակցության պատգամավոր Վիգեն Խաչատրյանի հիշատակը։
An extraordinary session took place at the RA National Assembly
Արդարադատության նախարար Գրիգորի Մինասյանն ասաց, որ կառավարությունն առաջարկում է օրակարգի երկու ընթերցում նախատեսող հարցերի երկրորդ ընթերցմամբ քննարկումը կազմակերպել առաջին ընթերցմամբ դրանց ընդունումից հետո 24 ժամվա ընթացքում։ «Նախագծերի քննարկման հրատապությունը պայմանավորված է հետեւյալ հանգամանքով։ Առաջին նախագիծը Հանրակրթության մասին օրենքում փոփոխություններ եւ լրացումներ կատարելու մասին օրենքի նախագիծն է։ Կառավարության 2023 թվականի փետրվարի 9-ի պետական հանրակրթական ուսումնական հաստատության տնօրենի պաշտոնի թափուր տեղի մրցույթի հայտարարման, անցկացման, մասնագիտական հանձնաժողովի ձեւավորման եւ տնօրենի նշանակման կարգը հաստատելու մասին կարգում գործընթացը մեկնարկելու պահից ի հայտ են եկել որոշակի խնդիրներ հավակնորդի որակավորման պահանջի մասով։ Երկրորդը Քաղաքացիական դատավարության օրենսգրքում փոփոխություններ եւ լրացումներ կատարելու մասին եւ հարակից օրենքների նախագծերի փաթեթն է։ Սրանով առաջարկվում է ընդհանուր իրավասության դատարանի բռնագանձման փոքր քաղաքացիական գործերը հանձնել նոտարների իրավասությանը։ Պրակտիկայում նման գործերը կազմում են ընդհանուր իրավասության դատարանների գործերի շուրջ 80 տոկոսը։ Նախագծի ընդունման դեպքում էականորեն կբեռնաթափվի դատական համակարգը։ Այս խնդիրներն օր առաջ լուծելու համար անհրաժեշտ է փաթեթի հրատապ ընդունումը»,- ասաց Գրիգոր Մինասյանը։
Նախարարը նշեց, որ Քրեական դատավարության օրենքի նախագծի ընդունման հրատապությունն էլ պայմանավորված է այն հանգամանքով, որ 2023 թվականի հուլիսի մեկից ուժի մեջ է մտնելու քննչական գործողությունների պարտադիր տեսաձայնագրման պահանջը։
Ռոզա ՀՈՎՀԱՆՆԻՍՅԱՆ
