Ռուսաստանում Միացյալ Նահանգների դեսպանությունը, նախքան «Վագների» հայտարարությունն այն մասին, որ դադարեցնում է իր շարասյուների շարժը Ռուսաստանում, քանի որ կարող է արյուն թափվել, անդրադարձել է Ռուսաստանում ստեղծված իրավիճակին:
Հաղորդագրության մեջ ամերիկյան դիվանագիտական ներկայացուցչությունը նշում է. «Մոսկվայում ԱՄՆ դեսպանությունը տեղյակ է Ռուսաստանի հարավ-արևմուտքում «Վագներ» խմբավորման ուժերի և Ռուսաստանի զինված ուժերի միջև մարտերի մասին: Ռուսաստանում անվտանգային իրավիճակը շարունակում է մնալ անկանխատեսելի: Մենք կշարունակենք վերահսկել իրավիճակը, սակայն ԱՄՆ քաղաքացիները պետք է տեղյակ լինեն, որ դեսպանությունը սահմանափակ կարողություն ունի պատշաճ կերպով գնահատելու անվտանգության պայմանները Մոսկվայում և Ռուսաստանի Դաշնության այլ տարածքներում»:
Հաղորդագրության մեջ ԱՄՆ դեսպանությունը Ռուսաստանում գտնվող իր քաղաքացիներին հորդորում է պատրաստ լինել ցանկացած զարգացման:
«ԱՄՆ կառավարությունն ի վիճակի չէ համակարգել ԱՄՆ մասնավոր քաղաքացիների տարհանումը Ռուսաստանի Դաշնությունից», – շեշտվում է դիվանագիտական ներկայացուցչության տարածած հաղորդագրության մեջ, որտեղ կոչ է արվում ԱՄՆ քաղաքացիներին մուտք չգործել Ռուսաստան, իսկ այն ամերիկացիները, որոնք այնուամենայնիվ ՌԴ-ում են, անհապաղ հեռանան, եթե անվտանգ է դա անել:
Կարդացեք նաև
Հիշեցնենք, Եվգենի Պրիգոժինի «Վագներ» մասնավոր ռազմական կազմակերպությունը «արդարության երթ» էր սկսել՝ վերահսկողության տակ վերցնելով Դոնի Ռոստովը և պահանջելով, որ պաշտպանության նախարար Շոյգուն և ԳՇ պետ Գերասիմովը գան հանդիպման, հակառակ դեպքում «Վագները» կշարժվի մայրաքաղաք Մոսկվա:
Նախագահ Պուտինը կատարվողը դավաճանություն և ապստամբություն էր որակել: Թեև Պրիգոժինը սկսեց շարժվել դեպի Մոսկվա, Բելառուսի Նախագահ Ալեքսանդր Լուկաշենկոյի միջնորդությամբ «Վագները» դադարեցրեց ՊՆ գործունեության դեմ ուղղված խռովությունները։
Արսեն ԱՅՎԱԶՅԱՆ
