«Մարդու իրավունքների ու մասնավորապես, երեխաների իրավունքների մասին են խոսում, իրենք գրեթե ամբողջ աշխարհում այդ կոնվենցիաների առաջամարտիկներն են: Կարծում եմ որ այս օրերի ընթացքում ամենաշատ մտահոգվածը իրենք պետք է լինեին, թե ինչպես են ապրում Արցախում մանուկներն ու նորածինները, հատկապես՝ մինչև մեկ տարեկան երեխաները, որոնք կաթնախառնուրդով են սնվում , որն առհասարակ չկա»: Այս մասին, լրագրողների հետ զրույցում ասաց Արցախի սոցիալական զարգացման ծրագրերի հիմնադրամի տնօրեն, նախկին ԱԺ պատգամավոր, Շիրակի նախկին փոխմարզպետ Սոֆյա Հովսեփյանը՝ ՄԱԿ-ի Հայաստանի գրասենյակի դիմաց՝ բողոքի ցույցի ժամանակ:
Սոֆյա Հովսեփյանը Ֆեյսբուք սոցիալական հարթակում գրառում կատարել տեղեկացնելով. «Ես այսօր` հունիսի 23֊ին ժամը 16։00֊16։30 ընկած ժամանակահատվածում կլինեմ ՄԱԿ֊ի գրասենյակի մոտ։ Ես ինձ հետ տանելու եմ մեկ տուփ մանկական կեր և կփոխանցեմ ՄԱԿ֊ի գրասենյակ` պահանջելով հասցնեն Արցախում ապրող որևէ բալիկի։ Ովքեր կցանկանան միանալ և ավելի շատ բալիկների ԿԽ ուղարկենք, կարող եք միանալ` ձեր հետ ունենալով մանկական կեր կամ կերեր» ։
Նրա կոչին արձագանքել էին բազմաթիվ քաղաքացիներ, որոնք մանկական կաթնախառնուրդների պաշարներով շտապել էին ՄԱԿ-ի գրասենյակ:
Կարդացեք նաև
«եթե մեծահասակները ինչ որ կերպ բնության բարիքներից օգտվում են, նորածինները բոլորովին անպաշտպան են: Ես որոշեցի, որ հենց այստեղ պետք է գանք և պահանջենք, քանի որ իրենք անտարբեր են արդեն 8 օր շարունակ տեղի ունեցող երևույթների՝ տոտալ շրջափակման նկատմամբ, գոնե պարտավորվեն կաթնախառնուրդը հասցնել երեխաներին, որպեսզի երեխաների ապրելու իրավունքը պաշտպանվի: Եթե նրանք անտարբեր են ազատ ապրելու իրավունքի նկատմամբ, ապա գոնե՝ ապրելու իրավունքին տեր կանգնեն»,-նշեց Հովսեփյանը:
Ի պատասխան Aravot.am-ի այն հարցի, թե ինչպե՞ս եք պատկերացնում հավաքված կաթնախառնուրդի տեղափոխումը Արցախ՝ Սոֆյա Հովսեփյանն ասաց․ «Պատահական չէ, որ հենց այստեղ ենք հավաքվել, որպեսզի ՄԱԿ-ի գրասենյակը կազմակերպի տեղափոխումը, և առհասարակ, կազմակերպի Արցախի երեխաների սնվելու խնդիրը, ինչ ճանապարհով ուզում են, թող հասցնեն, չէ որ իրենք հզոր կառույց են, մեզ մոտ գոնե այդպիսի կարծրատիպեր են ստեղծել»:
ՄԱԿ-ի գրասենյակից, սակայն որևէ մեկը դուրս չեկավ ու չհանդիպեց հավաքվածներին, պահակակետում երկար բանակցություններից հետո, ՄԱԿ-ի գրասենյակի համապատասխան հարցերի պատասխանատուն, որ հետո պարզվեց Սոֆյա Հովսեփյանի նախկին թիմակից, Կրթության և գիտության նախկին փոխնախարար Արևիկ Անափիոսյանն է, համաձայնեց պահակակետում առանձին հանդիպել Հովսեփյանի հետ՝ առանց լրագրողների: Ավելի քան 20 րոպե տևած փակ հանդիպումից հետո, Սոֆյա Հովսեփյանը տեղեկացրեց, որ իրեն տեղեկացրել են, թե միջազգային ոչ մի կառույց այսօր իրավունք չունի և հնարավորություն չունի մտնելու Արցախի տարածք:
Նրանք առաջարկել են կաթնախառնուրդները փոխանցել «Առաքելություն Հայաստան» ՀԿ-ին, որն էլ դրանք բաժանի Արցախից տեղահանված և Հայաստանում բնակվող արցախցիներին: «Ես ասացի, որ այդ մարդկանց տեղը մենք «Առաքելություն Հայաստանից» լավ գիտենք, եթե տեղահանված արցախցիներին պետք է բաժանվի, մենք կբաժանենք: Եվ, վերջինը, իրենք առաջարկեցին, եթե, իհարկե, մենք համաձայնվենք, իրենք խոսեն Ադրբեջանի ՄԱԿ-ի գրասենյակի հետ, առաջարկեն, որ լուծեն այդ երեխաների ապրելու հարցը և իրենք այդ երեխաներին տան կաթնախառնուրդ:
Ես բոլոր 3 տարբերակի հետ չհամաձայնվեցի, մենք որոշեցինք, թողնել կաթնախառնուրդները և պահանջել, որպեսզի ճանապարհ գտնեն, չէ՞ որ անընդհատ խոսում են իրավունքներից, ուրեմն պարտավոր են ապահովել այն»,-եզրափակեց Սոֆյա Հովսեփյանը:
Լուսինե ՄԱՐԳԱՐՅԱՆ
