Ադրբեջանը պատերազմում հաղթել է, հետևաբար խաղաղության պայմանագրում պետք է հաշվի առնվեն հետպատերազմյան իրողությունները: Նման հայտարարություն է արել Ադրբեջանի նախագահ Իլհամ Ալիևը՝ ելույթ ունենալով Ադրբեջանի ՊՆ կոմանդոս զորամասերից մեկում Մարտական նշանի հանձնման արարողությանը:
«Հայաստանի հետ խաղաղության բանակցությունների ավարտն այսօր պետք է նաև մեզ, բայց ավելի շատ՝ հենց Հայաստանին»,- ասել է Ալիևը:
Նրա խոսքով՝ խաղաղության պայմանագիրը պետք է ստորագրվի միջազգային իրավունքի նորմերը և սկզբունքների վրա՝ հաշվի առնելով ստեղծված իրողությունը:
«Այդ խաղաղության համաձայնագրում պետք է հաշվի առնվեն հետպատերազմական իրողությունները: Դա բնական է: Մենք հաղթել ենք, մենք արյուն ենք թափել, մենք կորուստներ ենք ունեցել: Մենք պատերազմ ենք մղել մեր հողում, այսօր ապրում ենք և կապրենք մեր հողում»,- ասել է Ալիևը:
Կարդացեք նաև
Նա նշել է, որ «անցյալ տարվա հոկտեմբերին Հայաստանը պաշտոնապես ճանաչեց Ադրբեջանի տարածքային ամբողջականությունը, իսկ անցյալ ամիս անգամ նշեց Ադրբեջանի տարածքի պարամետրերը»: Ըստ Ալիևի, սակայն, «այդ հայտարարությունները պետք է արտացոլվեն նաև փաստաթղթում և Հայաստանը պետք է այն ստորագրի»:
«Միայն այդ դեպքում Հարավային Կովկասում կարող է երկարաժամկետ խաղաղություն տիրել»,- ասել է Ալիևը:
Ըստ Ադրբեջանի նախագահի՝ մեկ այլ կարևոր պայման է «Զանգեզուրի միջանցքի» բացումը և «Ադրբեջանի Ղարաբաղ շրջանից հայկական բանակի զինված խմբավորումների դուրսբերումը»:
«Վերջին 2,5 տարում մենք մի քանի անգամ ստիպված ենք եղել ցույց տալ մեր ուժը հայկական կողմին: Նախ՝ որպես պատասխան նրանց ռազմական սադրանքների: Երկրորդ, մենք ազդակ ենք ուղարկել, որ եթե նրանք իրենց լավ չպահեն, չհարգեն իրենց ստորագրությունը, ապա արդյունքը նրանց համար ողբերգական կլինի,- ասել է Ալիևը:
Հետևաբար, ըստ Ադրբեջանի նախագահի, իրենք իրենց «զուսպ» են պահում: «Մենք երբեք շտապողականություն չենք ցուցաբերել: Դրա անհրաժեշտությունը չկա: Այսօր և՛ ուժն է մեր կողմում, և՛ ժամանակն է ամրապնդում մեր դիրքերը, և՛ միջազգային իրավունքը: Միջազգային հանրությունն արդեն միանշանակ ճանաչում է Ղարաբաղը որպես Ադրբեջանի անբաժան մաս: Մենք կարող ենք սպասել: Եվս մեկ անգամ եմ ասում՝ մենք չենք շտապում»,- ասել է Ալիևը:
Պատրաստեց Վիկտորյա ԱՆԴՐԵԱՍՅԱՆԸ
