Վաշինգտոն – ԱՄՆ պետքարտուղար Էնթոնի Բլինքենին հասցեագրված երկկուսակցական նամակը, որն առաջնորդեց Ներկայացուցիչների պալատի Պետական, արտաքին գործողությունների և հարակից ծրագրերի ենթահանձնաժողովի ավագ անդամ կոնգրեսական Բարբարա Լին, և որը ստորագրեցին ավելի քան 50 կոնգրեսականներ, վարչակազմին կոչ արեց կիրառել ԱԶԱՏՈՒԹՅԱՆ Աջակցության Ակտի 907 Բանաձևը, հաղորդեց Ամերիկայի հայկական համագումարը (Համագումար):
Ազատության աջակցության ակտի 907 Բանաձևում հայտարարվում է, որ ԱՄՆ-ի ֆինանսական միջոցներ «չեն կարող տրամադրվել Ադրբեջանի կառավարությանը, մինչ նախագահը չսահմանի և այդպիսով չզեկուցի Կոնգրեսին, որ Ադրբեջանի կառավարությունն ակնհայտ քայլեր է ձեռնարկում՝ դադարեցնելու բոլոր շրջափակումները և ուժի այլ հարձակողական գործադրումները Հայաստանի և Լեռնային Ղարաբաղի դեմ»:
«Մենք ողջունում ենք կոնգրեսական Լիի և նրա գործընկերների կողմից այս ճիշտ ժամանակին արված նախաձեռնությունը: Շարունակվող տառապանքը, որին բախվում են հայերը, անընդունելի է, և անհապաղ գործողություններ են անհրաժեշտ»,- ասաց Համագումարի Կոնգրեսական հարաբերությունների գծով տնօրեն Մարիամ Խալոյանը: «Ինչպես մենք ընդգծել ենք այս տարվա սկզբին Ներկայացուցիչների պալատում և Սենատում ներկայացված մեր վկայություններում՝ մենք հորդորում ենք վարչակազմին կիրառել 907 Բանաձևը, այլ ոչ թե կասեցնել այն: Համագումարը նաև վերահաստատում է իր դիրքորոշումը, որ ցանկացած խաղաղության համաձայնագիր պետք է ընդունելի լինի Արցախի ժողովրդի համար, և ինչպես դա արել է նախկինում, հորդորում է Կոնգրեսին և վարչակազմին պաշտպանել Արցախի ժողովրդի ժողովրդավարության, ինքնորոշման իրավունքի և մարդու իրավունքների համընդհանուր սկզբունքները»,- շարունակեց Խալոյանը։
Մեջբերելով «Ադրբեջանի կողմից Լաչինի միջանցքի ընդլայնված շրջափակման հետևանքով առաջացած հումանիտար իրավիճակի վատթարացումը», նամակում ընդգծվում է, որ «Ադրբեջանի շրջափակումը և՛ միջազգային մարդասիրական իրավունքի, և՛ նոյեմբերի 9-ի համաձայնագրի խախտում է… (և) «և նաև դեմ է այս վարչակազմի, ինչպես նաև միջազգային կառույցների, այդ թվում՝ Արդարադատության միջազգային դատարանի կոչերին՝ ապահովել Լաչինի միջանցքով առևտրային երթևեկի ազատ հոսքը»:
Կարդացեք նաև
Հորդորելով վարչակազմին կիրառել 907 Բանաձևը, նամակում ընդգծվեց, որ «մինչ գործում է Ադրբեջանի կողմից Լեռնային Ղարաբաղի շրջափակումը», վարչակազմը «չպետք է անվտանգության աջակցություն ուղարկի» և պետք է «դադարեցնի հետագա ռազմական աջակցությունն Ադրբեջանին»։
Ամերիկայի հայկական համագումար
