Վերաքննիչ դատարանն այսօր պետք է հրապարակեր ՀՀ ԶՈՒ 3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովի խափանման միջոց կալանքի դեմ պաշտպանների բողոքի վերաբերյալ որոշումը, սակայն որոշում չի կայացվել։ Խաչատուրովի փաստաբան Հակոբ Ենոքյանը «Առավոտի» հետ զրույցում ասաց, որ դատարանը որոշել է հարցը դնել բանավոր ընթացակարգով քննության։
Մայիսի 15-ին Հակակոռուպցիոն դատարանը դռնփակ նիստում որոշում էր կայացրել 3 ամսով երկարաձգել Գրիգորի Խաչատուրովի կալանքի ժամկետը։ Այս որոշման դեմ Խաչատուրովի փաստաբանները վերաքննիչ բողոք էին ներկայացրել։ Վերաքննիչ դատարանը տեղեկացրել էր, որ գրավոր ընթացակարգով է քննվելու բողոքը: Իսկ այսօր՝ հունիսի 22-ին դատարանը պետք է գրավոր ընթացակարգով հրապարակեր որոշումը։ Սակայն, ինչպես ասաց փաստաբանը, որոշում չի կայացվել։ «Այսինքն՝ դատարանն անցել է բանավոր ընթացակարգի, որպեսզի այս հարցը բանավոր քննի։ Նիստի օրը դեռ հայտնի չէ, կարծում եմ՝ նիստը դռնփակ կանցկացվի»,- ասաց Հակոբ Ենոքյանը։
Հիշեցնենք, որ Գրիգորի Խաչատուրովը մեղադրվում է փողերի լվացման մեջ: Ըստ մեղադրանքի՝ Խաչատուրովը, 2006-ից 2010 թվականներին զբաղեցնելով զորամասի հրամանատարի պաշտոնը, հանցավոր ճանապարհով ձեռք է բերել անշարժ գույք, ապա օրինականացրել այն։
Կարդացեք նաև
Ռոզա ՀՈՎՀԱՆՆԻՍՅԱՆ
